Jan van Nes: Cu Reforma Fiscal clientenan lo bebe awa enbes di biña

Jan van Nes, den su calidad di Presidente di Aruba Food & Beverage Association, a bisa cu miembronan di e sector aki no ta compronde e motibo pakico Gobierno ta persisti pa e cobransa di BBO, BAZV y BAVP no wordo poni riba e recibo sino den e prijs caba. Principalmente si mira cu na momento cu e di dos fase di e Reforma Fiscal drenta na vigor, esaki lo mester wordo adapta atrobe. Un dolor di cabes innecesario!
Despues di e diferente critica, Gobierno a duna e comerciantenan un periodo di gracia di seis luna. Locual ta nifica cu entrante prome di juli awo, e belastingnan aki no mag aparece mas riba recibonan. “Nos a haci un analisis profundo y no por a yega na otro conclusion cu inclusion di e belastingnan den e recibo lo ta desvastador. Nos mester bay imprimi menu cu prijsnan nobo, adapta e sistema di cobransa,  ta bay pasa den un pesadiya administrativo totalmente innecesario y nada practico, pero totalmente intransparente pasobra nos no por pone BBO, BAZV ni BAVP riba e invoicenan mas”.
Ta bay bati na porta di Gobierno atrobe pa informa nan cu e cambio aki no ta na fabor di comerciantenan y cu sector priva ta e wes’i lomba di e economia di.

Jan van Nes: Cu Reforma Fiscal clientenan lo bebe awa enbes di biña

Jan van Nes: Cu Reforma Fiscal clientenan lo bebe awa enbes di biña. Click aki pa mas https://24ora.tv/2JYinoG

Posted by 24ora on Tuesday, June 4, 2019

Ya caba e comerciantenan a pasa den diferente reto, manera eliminacion di saconan di plastic, aumento di accijns y sugar tax cu ta na caminda, ta gastonan cu hopi di nan no por pasa pa e consumidor. Aruba, el a bisa, ta conoci como un destinacion caro y ya caba ta aserca posicion no. 4 den e region di destinacionnan mas caro. P’esey lo apela atrobe na Gobierno pa laga e recibonan manera cu nan ta, incluyendo e cobransa di BBO, BAZV y BAVP riba e facturanan, te e fase 2 ora cu probablemente BBO lo wordo cambia of elimina.
E aumento di accijns tabata un di e medidanan cu mas a afecta e sector aki ya cu prijs di bebidanan a aumenta. Tin comerciante cu a absorba e aumento aki pero otronan mester a pasa pa e consumidor. E sugar-tax tambe lo bay tin su impacto.
“Nos ta compronde cu Aruba ta pasando den un situacion dificil, pero nos no por pasa tur e prijsnan na e consumidor cu e consecuencia cu nos ta mas caro.” Fase 2 lo mester drenta na vigor pa prome di juli, pero nan por a compronde for di Minister cu e sales-tax no ta algo cu lo bini awor y probablemente e lo ta algo viabel aki 18 luna. Si esey t’asina nan ta prefera pa warda pa e cambio wordo haci riba recibo aki 18 luna. Nan no por carga e gastonan aworaki y pa aki 18 luna bolbe haci cambio. Principalmente e gastonan cu esaki ta trece cun’e. “Si Prome Minister ta bisa cu nos puntonan ta valido, anto mi ta kere cu nan ta valido,” van Nes a bisa.
Loke cu a constata den tur e Reforma Fiscal, aunke cu tabata un fase so, ta cu loke e hendenan ta gasta den F&B a bira menos. E clientenan ta comparti appetizer, enbes di tuma un cocktail of biña, awor nan ta bebe awa. Awo si den temporada halto ta tuma mas hende, a hala faha mara y doñonan mes tambe ta traha den e negoshi di F&B.  Y, hopi turista ta cumpra na supermercado “pasobra Aruba ta hopi caro”.