Diahuebs anochi a tuma luga un session di brainstorming titula ‘Turismo den Perspectiva: Scucha, Pensa, Recupera Mihor’ caminda James Hepple a hiba palabra. El a acepta e invitacion haci dor di Partido di Pueblo Arubano (AVP) pa realisa e apertura di e panel dor di comparti informacion riba e situacion actual y pronosticonan pa industria di turismo.
Miho conoci como Jim, Hepple tin un experiencia y conocemento amplio di e tema. El a fungi como director di Aruba Hotel & Tourism Association (AHATA), ta un professor di e facultad di turismo na Universidad di Aruba y ta fungi actualmente como e director di e agencia ‘Tourism Analytics.’
Hepple a indica riba e importancia di e encuentro y pakico el a participa den dje. “Pa mi ta hopi importante pa nos bin cu solucionnan cu ta garantisa cu nos industria turistico ta recupera mas lihe cu por, pesey mi tabata contento di forma parti di e proceso.”
Hepple ta residencia na Aruba desde 2009, y durante su temporada na cabes di AHATA, a traha hopi cerca cu ex Prome Minister Mike Eman, mescos cu Richard Arends y Rene Herde, entre otro. “Mi ta contento di ta akinan pasobra e ta lagami corda di tempo nos tabata reuni akinan den e proceso pa Dialogo Social.”
Turismo ta nos weso di lomba, e ta splica, caminda 70%-75% di nos economia of 3 di cada 4 trabou ta depende di turismo. Ta importante pa tur esnan envolvi den e industria y den comunidad papia cu otro riba con ta bay traha hunto. “Si nos traha hunto y compronde e necesidadnan di otro, nos por bin cu solucionnan cu ta funciona pa henter e comunidad.”
E evento organisa pa AVP a trece hunto representantenan di sectornan comercial, laboral y turistico pa trece dilanti nan preocupacion, pero tambe nan sugerencia. E commission cu a hinca esaki den otro ta consisti di mr. Mike Eman, Jennifer Arends Reyes, mr. drs. Richard Arends, Robert Candelaria, mr. Gerlien Croes y drs. Rene Herde. “Mi ta kere awenochi ta djis un ehempel di con varios element di comunidad por trece e ideanan cu nan tin dilanti y nos por bons e ideanan aki rond pa wak cua ta esun cu ta mustra di tin e mayor chens di ta exitoso. E ta un practica hopi util,” Hepple a bisa.
