Apenas a renoba e contract di Schiphol Group cu Gobierno di Aruba pa opera Aruba Airport Authority N.V. (AAA) pa 5 aña mas y ta net den inicio di e proyecto di mey biyon florin di ampliacion di nos Aeropuerto, cu awe merdia den forma di sorpresa e Chief Executive Officer (CEO) di AAA a anuncia cu e ta kita for di trabou. Su contract cu e compania ta vence na augustus 2019 pero ta cla pa sigui su carera na Merca y no mas aki.
E forma abrupto di tuma retiro a percura pa hopi pregunta, si tin di haber cu politica, cu e financiamento grandi, cu e proyecto di construccion, etc. Den su email di despedida el a menciona cu su retiro ta pa motibo personal. Fazio a confirma na nos cu Schiphol Group a identifica un ehecutivo cu lo tuma su funcion over entrante 1 di september 2019.
Desde dia 1 di september 2014 nos compania nacional Aruba Airport Authority (AAA) a apunta James Fazio como e CEO nobo cu un contract di 5 aña. Dicho contract a vence pero a renoba e contract fin di aña pasa pa un otro periodo di 5 aña mas. Mester menciona cu e nombracion di Fazio a bin despues di retiro di Peter Steinmetz. Schiphol Group mes a cuminsa opera e Aeropuerto di Aruba desde aña 2004, bou gobernacion di Partido MEP.
James Fazio tabata e Chief Operations Officer na JFKIAT, e Operator Terminal 4 na John F. Kennedy Airport na New York. Den e posicion aki James Fazio tabata responsabel pa e operacionnan diario y planeacion strategico di Terminal 4 di JFK Airport cu tabata maneha 17 miyon pasahero pa aña pa awor bin Aruba cu ta maneha 2.5 miyon pasahero tur aña. Fazio a uni su mes na JFKIAT na aña1997 y anteriormente el a traha pa The Port Authority di New York y New Jersey den diferente posicionnan di supervision.
Kico Fazio lo bay haci awo no ta mucho sigur, pasobra el a menciona awe di lo regresa New York ta continua cu su carera. E no tabata specifico si lo ta cu e compania Schiphol Group mes of riba su mes. Su señora tambe ta biba y traha na Aruba cu e compania NACO cu a gana e destaho publico pa diseña e proyecto di ampliacion di Aeropuerto di Aruba.
Ken lo keda na timon di e compania no ta mucho sigur ainda, pasobra e doño di AAA NV, esta Gobierno di Aruba, a cera un contract di maneho cu Schiphol Group. Si Fazio bay, ta responsabilidad di e compania pa manda un otro ehecutivo pa asumi e puesto di liderazgo. Sinembargo, pa e ultimo 15 añanan, den tur contract Schiphol Group a priminti di prepara un ehecutivo local pa tuma timon di Aeropuerto ora nan bay, pero lamentablemente nunca a cumpli. Awo cu Fazio mes a dicidi di bandona e compania memey di un proyecto grandi, lo ta na su luga pa evalua si ta e momento ideal pa un Arubiano mes tuma over, aunke lo ta trahando pa Schiphol Group. Ken miho cu nos mes pa sa unda nos kier hiba nos Aeropuerto?!
