Ivan Winterdal di Papilon: Luz, klinkers y caminda asfalta ta un necesidad di pueblo

Cerca famia Winterdal tabata existi un alegria grandi diabierna ultimo despues cu nan a mira e prome luz den nan caya cende. Esaki a wordo haci durante un ceremonia simbolico y realisa door di Prome Minister Mike Eman, kende ta iniciador di e programa Luz den Bario.

Prome Minister Mike Eman durante su prome y di dos gobernacion  a cana den bario y den combersacionnan cu personanan manera Ivan Winterdal di Papilon, luz di caya den barionan scur tabata e peticion cu semper ta bini dilanti. Diabierna Gabinete Mike Eman II a haci deseo di e famianan di Papilon un realidad. “Mi welo a campaña cu ruman di Prome Minister Mike y mi tata tambe tabata riba lista. Semper nos a apoya AVP. E 5 strea a yega Papilon, pa cual mi ta hopi contento y agradecido”.

No menos cu 12 mil luz LED a wordo cumpra door di Utilities NV pa cambia 9 mil luz di caya convencional pa LED y na mesun momento crea 3 mil punto nobo di iluminacion pa barionan cu nunca tabatin luz.  Ivan Winterdal a gradici e mandatario cu su gobierno no a lubida pa proyectonan pa Santa Cruz. El a menciona por ehempel Sint Antonius College cu a keda masha bunita despues di su renobacion. “E ta un joya di un proyecto. Nos ta hopi contento cu e programanan manera Luz den Bario y embeyecemento di Aruba. Cualkier persona cu bisa e cosnan aki ta cosnan chikito, manera klinkers, mi tin cu bisa cu e cosnan aki ta aspectonan hopi escencial pa habitantenan cu ta biba den stof cu e camindanan ta produci. Tin hende ta bisa cu no mester klinkers of luz. Pero nan ta un necesidad. Luz ta hopi importante pa e bario y mi ta masha contento y agradecido na Prome Minister cu el a yega Papilon,” Winterdal a bisa.