E aña aki ta e prome aña cu tur dunadonan di cuido na Aruba mester entrega un kwaliteitsjaarverslag cerca Inspectie Volksgezondheid Aruba (IVA). Den e documento aki IVA ta pidi informacion di entre otro e maneho, incidentenan, kehonan entrega, protocol y proceduranan di un practica y/of institucion di cuido. Pa e Ley di Calidad di Cuido, e ultimo dia pa entrega e kwaliteitsjaarverslag tabata diabierna 1 di juni 2018. Na final di e dia aki, IVA a ricibi alrededor di 100 documento di e total di 180 cu mester a wordo entrega.
Pa IVA e ta un logro hopi grandi pa a ricibi mas cu 50% di e kwaliteitsjaarverslagen riba 1 di juni 2018 despues di 9 luna di hopi preparacion. For di september 2017 IVA a cuminsa manda varios recordatorio y a tene diferente anochi di informacion. Pues, a sinta hunto cu e diferente dunadonan di cuido pa splica kico ta wordo spera di nan. Ademas a traha un documento standard cu e diferente componentenan cu mester tin den e verslag y a manda esaki pa tur dunadonan di cuido. Na e manera aki, nan lo por a yena e informacion necesario mas facil.
E meta di IVA ta pa stimula mehoracion di e calidad di cuido na Aruba. Pa por haci esaki, e ta importante pa ricibi data concreto pa por midi e situacion actual y extrae cua puntonan mester di atencion e añanan venidero. Un kwaliteitsjaarverslag no ta solamente importante pa IVA, pero muy specialmente pa e veld di cuido mes. Pa es motibo e diferente gruponan di cuido (p.e. partera, dokternan di cas, specialista etc.) lo haya conseho y recomendacionnan specifico a base di locual a wordo conclui di e contenido di e kwaliteitsjaarverslagen pa nan grupo di cuido. Pues, esaki lo ta e momento oportuno pa por siña di otro pa asina por keda mehora e calidad di cuido na Aruba.
Como cu IVA ta profila su mes manera un organisacion pro activo y transparente, a haci’e un prioridad pa caba cu su propio jaarverslag riba 1 di juni 2018 tambe. Den e ‘Jaarverslag 2017’ di IVA por haya informacion di entre otro sondeonan haci, keho y calamidadnan ricibi den 2017 y desaroyonan interno. Un copia di e jaarverslag aki a wordo entrega na Minister di Turismo, Salubridad Publico y Deporte, Dangui Oduber, tur dunadonan di cuido y e Comision di Salud di Parlamento. E jaarverslag aki lo wordo poni riba nos website www.iva.aw den e siman venidero.
Tur esunnan cu no a entrega nan kwaliteitsjaarverslag riba 1 di juni 2018, por spera un waarschuwingsbrief riba 4 di juni 2018. Por ultimo, IVA ta gradici tur dunadonan di cuido cu a entrega nan kwaliteitsjaarverslag na tempo y kier a informa nan cu nan lo wordo manda un ontvangstbevestigingsbrief.
