Diasabra atardi laat despues di entrevista cu 24ora, Israel Paesch a bay na cas di su mama.
E tabata desea pa bisa ayo na su yiu di ocho aña y tambe na su mama. Asina 24ora mes a yama recherche cu tin e caso y asina den tur trankilidad Israel Paesch a sali y entrega su mes di biaha na e recherchenan cu a mustr’e riba su derechonan.
Manera Israel mes a conta, el a tira Rene Paesch, cu ta su primo. Awe marduga ainda Israel Paesch a haya un bati pafo di Lekker, caminda el a haya hopi sla. E no tabata por mas cu e cantidad di maltrato cu e tabata ricibi.
https://www.facebook.com/24ora/videos/774123231687538
Ultimamente ni pisca e no tabata por a bende mas na Santa Cruz. Constantemente Rene tabata yega pa agredi y p’esey e tabata evita di sali. E tabata kier a biba pa su yiu. Asina mes e tres biahanan cu el a sali, el a topa Rene y a haya bati. Algun tempo pasa den un club nocturno a dal e hasta cu boter lag’e tur destrosa.
Na un ocasion tambe nan a kima su boto pafo di cas. Asina e mester a biba, manera e mes a conta. Finalmente el a logra awe diasabra loke e tabata kier prome cu entrega su mes. E ta cla pa conta tur e berdad y sinta e castigo cu dun’e. E arma el a bisa su ruman pa entrega esaki na autoridad. Ta trata di un pistol 9mm.
E mes no por a conta precies cuanto tiro el a los. E sa cu el a tira Rene. Un situacion familiar dificil cu a caba den un asesinato.
Logicamente pa Israel loke el a haci tabata den defensa propio. El a haya un bati atrobe na Lekker, el a sali bay su cas y agresor a bin te na su port’i cas. Un situacion cu a caba den un drama familiar unda Israel a tira Rene Paesch, cu ta su primo, mata.
