Cada biaha, cada siman, e situacion na CITGO ta birando pio. Tabata tin contacto cu Boy Anthony, kende ta e presidente di sindicato IOWUA. IOWUA ta luchando cu alma y cuerpo pa evita un situacion mas fastioso pa e trahadonan di e refineria.
Segun Anthony, diahuebs siman pasa a exigi un reunion cu CITGO pa duna e sindicato claridad di loke ta pasando. A mira cu contratista ta bay cas, esey no ta haya pago. Cierto momento ta yega nan turno tambe.
A splica nan cu e situacion ta bon, no ta pagando ningun contratista y unico hendenan cu nan ta pagando ta e personal di terminal, pa nan keda, pasobra e terminal cu ta provide FMSA cu gasolin, diesel, jet. Y e ta hopi importante pa full Aruba.
Mester duna tur hende chens pa haci pregunta pa expresa. Mientras tanto, tabata tin un barco cu mester a drenta dia 31 cu tres grade, cual ta diesel, jet y gasolin, cu ta bin cada 45 dia. Esaki a wordo poni on hold. Eynan caba tin un preocupacion. E productonan ey, cu ta asina importante pa nos turismo, pa nos isla, pa hotel, pa tur cos, no por drenta, algo fout ta pasando.
E ora a cuminsa investiga kico ta kico, dicon no. Ta bon mes cu diaranson of diahuebs, Anthony a traha anochi y hunto cu su otro coleganan a hinca e barco anochi, mare y descarge, cu awo tin garantia cu tin e productonan aki tey.
Rumornan hopi fuerte ta coriendo cu tin placa pa un kincena mas so di salario y cu no tin placa pa pakete. Esey ta trece un problema hopi grandi. A negosha na 2012, e combinacion di cantonrecht nobo y bieu. Tabata un di e miho paketenan cu IOWUA a yega di negosha. Awo cu 53 hendenan a bay directo cu e refineria, tambe nan a hay’e. Awo cu ta toca e parti di terminal, e no tey. E placa no tey. Segun rumornan, e kincena aki ta e ultimo cu tin placa pa salario y e pakete no ta existi.
Diabierna, esta awe, Anthony a laga e miembronan di directiva yama nan grupo, pone nan na altura, yama abogado Lejuez pa por sinta cun’e. Loke e trahadonan kier, ta un garantia preto riba blanco cu nan pakete y añanan di servicio ta wordo paga.
E carta aki ta bay pa CITGO, pa mediador di gobierno, pa gobierno mes, pa RDA, pa tur hende.
Tambe loke nan ta exigi, ta pa e collective working agreement cu a wordo firma na 2017, wordo cumpli.
Tambe, nunca Anthony a mira Gobierno, RDA y CITGO sinta hunto den un conferencia di prensa, unda cu por lansa preguntanan na nan tres.
E trahadonan kier sa, despues di awe, con nan ta para. Si no bin un solucion cu e rumornan fuerte cu ta coriendo, cu otro siman no tin salario pa e transhipment, con ta bay haci cu e transhipment. Con ta garantisa pueblo di gasolin, diesel, jet y fueloil pa WEB. Unda e garantia ey ta sali. Ta bay estilo di Esso Petrolera riba un minimo cu marine no tey, nada no tey. Ta solamente esey? Kico e plan ta, Anthony ta cuestiona. Ta yega tempo pa haya transparencia, claridad. E cos aki ta toca tur hende.
Ainda no a haya nan pago. Normalmente nan mester a cobra diahuebs. Awe, diabierna, ainda nan no a haya nan pago. Pakico tanto drama. Banconan tambe ta bay yega un punto cu nan ta bay haci fastioso. Ora cu nan ta bon, nan ta bon cliente. Ora cu nan ta den situacionnan asina, nan ta haci fastioso.
Esey tampoco no ta bon. Tin cu ta cu nan den bon y mal tempo. Mester bin cu areglo, pasobra nan placa ta bon, ora nan tin’e. Ora cu situacionnan ta manera esaki, nan ta bay manera cauteloso y duda di e trahadonan. E problema aki, nan no a ocasion’e. Nan ta simpel trahado.
