IOWUA: Gobierno a priminti di blokia salida di ehecutivonan di CITGO tanten no tin acuerdo

Citgo practicamente a pone un ultimatum pa e empleadonan den e refineria miembro di Federacion di Trahadonan di Aruba (FTA) y Independent Oil Workers Union Aruba (IOWUA), esta cu loke nan tin pa finalisa e relacion di trabou ta wordo paga dia 30 di januari y nada mas. Y despues di e fecha aki ta considera cu e relacion di trabou como finalisa.

Boy Anthony, Presidente di IOWUA, a expresa cu for di prome instante a bisa CITGO y e team negociado cu e pakete presenta no ta aceptabel pa nan. Nan tabatin masha problema cu henter e situacion pa motibo cu CITGO no a cumpli tampoco cu e belastingnan cu nan mester a paga na Gobierno y riba dje, e CAO cu nan tin firma ta valido te cu november, 2021. El a recorda cu e prome 56 personanan cu a manda cas, a haya un pakete lucrativo, mientras cu e otronan a sigui traha pa awo bin bisa cu nan tambe mester bay cas pero hayando lo minimo cu ley ta prescribi.

IOWUA a pidi gobierno pa blokia salida di tur ehecutivo di CITGO. Click link pa mas https://24ora.news/36W5TW5

Posted by 24ora on Wednesday, January 15, 2020

Debi na e situacion ariba menciona, e sindicato a pidi Gobierno pa blokia salida di ehecutivonan di CITGO tanten cu no yega na un acuerdo riba e asunto aki. “Mi a haya confirmacion di Gobierno cu no ta laga e hendenan aki sali tanten cu  nan no keda cla cu e trahadonan.”

Den e problema aki sindicato y tur e trahadonan, incluyendo staff, a uni pa hunto cu e Abogadonan trata di yega na un solucion. Pa trata di yega na un solucion pa e 66 empleadonan cu CITGO kier manda cas awo.

IOWUA tin masha problema pa e forma con ta laga e instalacionnan bay atras, e waf ta deplorabel y na diferente ocasion a pidi pa DTI bay haci e controlnan.

E situacion aki ta pone cu IOWUA tambe a pidi Gobierno pa no firma e retironan y ni e documento di traspaso di facilidadnan di Citgo pa Gobierno. No por permiti cu e compania internacional ta bandona e isla sin cumpli debidamente cu su obligacionnan. “Tur hende tin cu pone presion riba nan manera. IOWUA y FTA a haci di nan banda. Awo Gobierno mester manda un carta cla y raspa pa CITGO bisando cu tanten cu no cumpli cu e trahadonan y duna nan un pakete decente, nan no ta sali. Si ta na Merca of Hulanda, nan mester cumpli.”

E experencia di IOWUA cu Citgo no ta nada bon. “Esaki ta e compania di mas malo cu nos a yega di deal cun’e. Ora cu nan a bin nan a bisa di ta miho den siguridad y pago, pero den practica esaki ta diferente. Nos mester keda pone presion riba CITGO pa nan paga algo decente y despues baha na awa bay tambe.”

Promesa falso

24ora.com a averigua cu Abogadonan, kendenan a bisa cu Gobierno no por haci un promesa asina. Y Gobierno no por blokia salida di e ehecutivonan, a menos cu nan debe belasting. Esey ta e unico forma. Pues si Gobierno yega na un acuerdo total riba e traspaso, den cual ta regla e asunto di impuesto no paga, nan no por stroba nan di bandona Aruba.