Atendimiento di trafikashon di hende ta algun aña kaba un prioridat denter di Ministerio Públiko (OM) Kòrsou. Trafikashon di hende ta eksplotashon di persona ku mayoria biaha ganashi finansiero di e kulpabel nan.
OM di Kòrsou ta risibí mas i mas señal for di instansianan di guia sosial di eksplotashon seksual di menor di edat. OM ta señalá esaki tambe den praktiká diario di kasonan kaminda sospechosonan ta keda kondená den Korte pa abusu seksual di menor di edat. Hopi biaha e terser parti ku ta fasilitá pa netamente e ganashi finansiero no ta wòrdu responsabilisá pa e echonan kastigabel aki. E sospechoso fuerte ta ku mucha muhé menor di edat ta ser disponé na sèks komersial. Nan ta ser ofresé den prostitushon i ta ser eksplotá seksualmente i komersialmente. E hecho aki, tráfiko di mucha/kinderhandel, ta kastigabel pa lei konforme artíkulo 2:240 di Kódigo Penal.
E konsekuensia di abuso seksual i eksplotashon seksual riba término kòrtiku: malesanan venériko, embaraso hubenil, aborto i terminá skol trempan. Riba término largu: trouma sikológiko, adikshon, violensia dor di víktima ku ta trese víktima nobo kuné. Prevenshon ta hopi importante pa evitá hopi otro problema den nos sosiedat. Kombatimentu I prevenshon di abuso seksual no por keda atendé solamente dor di atendé via e kaminda penal. E ta un problemátiko kompleho ku mester ser atendé di un forma integral.
Ministerio Públiko Kòrsou ke, den 2018, inisiá un atendimiento huntu ku instansianan i ministerionan pa di e forma aki atendé di un forma integral e abusu kontra menor di edat.
Ke logra esaki pa medio di un proyekto den kual ta hasi uso di investigashon i kompilashon di informashon pa di e forma aki haña un bista realístiko kon e fenómeno aki ta manifestá su mes riba Kòrsou. Ta hasi esaki den koperashon ku e ministerio di SOAW.
A base di e resultadonan di e investigashon aki mester bin ku un plan di atendimiento integral i multidisiplinario pa trata e tema di abuso seksual di menor di edat riba Kòrsou. Ta trata e ora ei di un plan kon pa rekonosé, mèldu, registrá, monitoria, maneho, lei, opvang, duna yudansa, investigá i pa persigishon penal
