Investigando banconan Chines clandestino na Aruba

For di mainta trempan un ekipo forma pa Polis, Recherche Samenwerkingsteam, (RST), Landsrecherche, FIOT (Departamento di Impuesto) y militarnan di Marina Real Hulandes a bishita diferente cas y negoshinan na Aruba. Un di e negoshinan cu a haya e bishita aki ta Pacifico Supermarket & Restaurant situa na Montana na Dakota.

Aki a pone beslag riba henter e administracion di e negoshi y a bay cu un suma cuantioso di placa den efectivo. Husticia ta sospecha cu aki ta trata di un red financiero clandestino, den cual comerciantenan Chines ta financia otro di forma ilegal y for di e regimen y supervision di Banco Central di Aruba. Ta cataloga e practica aki como “Underground Banking”.

Un otro adres cu a haya bishita awe mainta ta un comerciante Chines situa den Wayaca Residence. Probablemente e cas ta pertenece na e mesun grupo di negoshinan aki. Ey tambe a bay cu documento, administracion, computer y mas for di e cas. Tur pa forma parti di e investigacion penal andando.

Durante e “huiszoeking” aki a haci uzo di cachonan di Polis pa busca placa, droga y arma di candela. Tambe a uza militarnan Hulandes cu cara tapa y arma, den e proceso pa drenta e cas y establecimentonan y evita cu cualkier hende ta sali core of stroba e investigacion. Den e tipo di “huiszoeking” nan asina ta bay cu un wowo masha skerpi pa otro delitonan tambe, por ehempel “mensenhandel” of “mensensmokkel”.

 

Investigando banconan Chines clandestino na Aruba

Investigando banconan Chines clandestino na Aruba

Posted by 24ora on Wednesday, May 15, 2019

Un di e motibonan cu a pidi yudansa y sosten militar, ta pa nan capacidad y habilidad di haya esconditenan secreto den cas of edificionan. Den e caso aki ta referi na esconditenan pa warda placa efectivo.

Aparentemente e figuranan principal tras di e skema aki no ta consciente cu e asunto ta ilegal y ta castigabel penalmente. Ta duna un indicacion cla cu hopi di e comerciantenan Chines no ta haci uzo di nos sistema bancario, ta tene dos administracion y ta purba pa mas cu por, evadi impuesto. Dor di haci esaki, nan ta competi na un forma inhusto cu otro comerciantenan cu si mester declara y cumpli cu nan obligacionnan legal, di belasting y di pagonan social.

No ta prome biaha cu ta descubri esconditenan di placa secreto den negoshinan Chines. Den pasado esaki a sosodena mas di un ocacion y a logra decomisa sumanan miyonario “cash” di cual tur a keda den beslag y a pasa riba cuenta di Gobierno.

Mester menciona cu no tabatin detencion den e caso aki ainda. Probablemente awor cu autoridadnan a bay cu asina hopi documento, computer y otro evidencia, incluyendo placa efectivo, lo mester interoga esunnan envolvi pa nan declara na unda a yega na e suma di placa aki, con e placa a drenta nos sistema financiero, sin pasa bou supervicion di Banco Central.

Comments

comments