Awe mainta Polis a presenta na Daltra Antiles N.V. situa na Parkietenbos net dilanti Dump, pasobra atrobe a descubri artefactonan horta riba nan tereno. E compania ta conoci pa cumpra hero y koper for di publico pa nan exporta. No semper e koper ta procedente for di un fuente legal. Awe tabata un di e casonan aki atrobe, unda a topa cu material horta, cla pa exporta for di Aruba!
Un empleado di WEB Aruba N.V. a reconoce artefactonan of obhetonan procedente di un hortamento na WEB. Mesora el a bati alarma y a pidi presencia di su superiornan pa atende cu e descubrimiento aki. Na mes momento a tuma contacto cu Polis pa por taha un proces-verbaal di e sucedido.
WEB a bay cu tur su materialnan, mientras cu Polis a keda di investiga, pa haya for di Daltra, kende a bin bende nan e hero bieu ey cu mas bien ta material for di e planta di nos compania nacional di produccion di awa y coriente. Asina den pasado a topa tambe cu material di refineria cu a bin termina eyriba, cla pa exporta for di nos isla. E compania mes ta insisti cu nan no tin control di unda e material ta bin, solamente nan ta cumpra koper y hero bieu pa exportacion.
