No ta normal con a maneha Serlimar e ultimo añanan aki. Ta parce comosifuera cu den forma delibera a yena e compania Sui Generis cu trahado y a crea debe riba debe. E prome investigacion riba maneho financiero awor ta habri caminda pa un investigacion forensico pasobra di 10 miyon florin cu a gasta di mas, ta solamente 6 miyon tin “hustificacion” y ainda tin 4 miyon florin cu ningun hende por splica “ta na unda el a bay”.
Serlimar a crea debenan innecesario den e ultimo dos añanan aki. Tres debe grandi sigur, cu ta e incinerator chikito na dump, trucknan di sushi nobo y huurmento di e edificio na Pos Chikito. A crea un “perfect storm” cu awor Minister Marisol Lopez-Tromp mester purba salba.
Asina por ehempel e compania Grant Thornton a informa den nan investigacion cu aña pasa, mientras cu e compania tabata pasando den temponan dificil, Minister Otmar Oduber a laga emplea no menos cu 35 trahado nobo, un aumento di 18% cu e aña prome. A hisa e cantidad di trahado for di 194 pa 229 trahado cu ta cobra un salario tur luna eyden.
Papiando di gastonan di personal, a nota tambe cu e gastonan mara na salario y beneficionan a subi cu 3.1 miyon florin aña pasa, cu ta nifica un aumento di 24%. Como cu no ta consciente cu Serlimar a cuminsa ofrece servicionan nobo, e ora por conclui cu a tuma mas trahado pa haci e mesun trabou di semper, cu ta nifica cu productividad a baha.
Locual ta preocupante, saca for di e investigacion conduci pa Grant Thornton, ta indica cu Jaarrekening di aña 2017 y 2018 ainda ta den “draft”, pues cu ainda no ta cla ni oficial. Esey ta mustra cu gerencia y Hunta di Supervision tabata maneha un compania sin rumbo, pasobra nan no tin cifras pa sostene e maneho cu nan tabata hibando.
Si nan lo a percura pa tin cifra riba mesa, nan lo a tuma nota cu e debenan cortico di Serlimar a aumenta di 14.7 miyon pa 25.4 miyon, pues casi dobel! Mayoria di e debenan aki ta pa belasting cu nan no ta pagando, ni tampoco e primanan social di nan trahadonan.
E maneho aki di keda sin paga debenan mensual, a tuma luga mientras cu Serlimar a ricibi 1.7 miyon mas di locual nan a solicita di Gobierno na subsidio. Pero mientras cu di un banda nan a haya MAS di Gobierno, nan a cobra MENOS na clientenan. E nivel di cobransa cu tabata malo caba, na 40%, a baha te na 20.4%.
Na maart 2019, Minister a kibra e contract cu Johnson Enterprizes, cu tabata maneha un incinerator chikito den Dump na Parkietenbos. A tene un destaho publico cu awor ta bou di investigacion, despues di keho di corupcion entrega dor di Booshi Wever. Na un forma dudoso, amigo di e Minister, esta Caribbean Trucking, a gana e “bid” aki. Di maart 2019 pa februari 2020, e proyecto aki a costa Serlimar 1.6 miyon florin pa cumpr’e y 402 mil florin na gastonan adicional, pa surpasa e bunita suma di 2 miyon florin. Y te ainda e incinerator no ta trahando!
Ta bon pa enfatisa cu e incinerator aki ta un chikito cu tabatin caba y trahando, pero Serlimar a opta pa kibra contract cu Johnson Enterprizes, paga nan un suma cuantioso pa kibra e contract, pa asina cumpra un incinerator nobo di nan mes. Esey ta diferente na e plan original di e Minister pa cumpra un incinerator grandi pa kima tur sushi di Aruba, cu consecuencia cu dump na Parkietenbos y EcoGas lo mester a cera nan portanan. E plan ey lo a costa riba 300 miyon dollar y consecuentemente Otmar Oduber no a haya sosten den Parlamento pa cambia e leynan necesario.
Den e post di ‘General and other expenses’ a nota un crecemento tambe di 8 pa 18 miyon florin, sin cu ta duna mucho motibo con e gasto ey a aumenta. Ta solamente ta indica cu pa maneha Ser’i Teishi a paga na aña 2018 e suma di 2.9 miyon florin entre EcoGas y Caribbean Trucking mientras cu na aña 2019 e suma a subi na 4.9 miyon florin.
Locual tur hende por a mira si, tabata un campaña di promocion grandi di parti di Serlimar, cu na final no a atrae ni clientenan nobo ni tampoco a incentiva clientenan pa paga nan cuentanan mensual. Tanto na aña 2018 como 2019 a gasta 300 mil florin pa aña na informacion y promocion. Pero na 2019 a crea un post adicional di “Marketing” cu ta costa e compania 527 mil florin. Pues aña pasa Serlimar a inverti riba 800 mil florin na propaganda!
Si analisa e cifranan bon, anto por conclui cu for di e aumento di 10 miyon florin di e gastonan aña pasa na Serlimar, tin por lo menos 4 miyon florin cu no tin hustificacion ni splicacion.
Loading…
Reload document 
Open in new tab 
