Inval na cas di Aisha Esser campañador di Otmar Oduber

7512

Mainta tempran autoridadnan a drenta un cas den Caya Frere Vicentius, Madiki. Ta trata aki di e cas di Aisha Esser, fiel campañado di Otmar Oduber.

E inval tin di haber cu investigacion caso Flamingo, den cual ta buscando informacion relaciona cu 8 sospecho contra e ex Minister di partido POR cu ta forma parti di e actual Gobierno di Gabinete Wever Croes.

Dia 24 di juni ultimo autoridadnan a tira un inval na cas di Otmar Oduber na Pavia y na diferente otro adres mas. Despues di un silencio largo, autoridadnan a sorprende cu e inval na cas di sra. Esser, kende ta esun responsabel pa busca y recoge sponser di e politico Otmar Oduber.

E team cu a tira e inval tabata consisti di diferente specialidad, entre otro e parti forensico. A saca basta caha cu documento saca for di e cas, pero tambe di e vehiculo personal di Esser.

Aisha Esser: “drenta numa,” mi a bisa e polisnan, segun Esser. “Mi no tin nada di sconde. Mi ta un trahado di Otmar y mi no ta bay gaña. Door cu mi ta traha directamente cu Otmar y pesey nan a bin investiga. Semper mi a haci trabou di politiek, pero nada di pidi placa aki aya. Nunca di mi bida mi a bay DIP. Ora Otmar a drenta, prome cos el a bisa nos ta no por bay DIP. SI mester di un documento, mester pasa via di Otmar. Ningun di e tres trahadonan no tabata mag di haci esaki,” el a conta.

El a bisa cu e ta lamenta loke ta pasando pasobra nan ta simpel trahado, nos ta haci nada malo. E ta bisa di a papia cu Otmar Oduber, kende a sigur’e di ta inocente. Tambe Esser a conta cu den e tres añanan a atende mas cu 5 mil persona.

Segun Esser a bisa tambe nan a bay cu “algun documento” y su celular.  

E team ta consisti di personanan cu a bini Aruba for di Hulanda specialmente pa concentra riba e caso Flamingo. Tambe miembronan di Landsrecherche y RST tabata presente.