Intervencion di Radiologia awo modernisa den compleho nobo

E compleho nobo cu a caba di habri na Hospital ta conta cu dos camber pa haci intervencionnan di cual un di nan ta destina pa intervencion di radiologia.

Intervencion di radiologia tabata existi caba na Hospital pero cu e tecnologia sofistica y un camber ful renoba aworaki por brinda mas servicio ainda. E avance aki ta trece cu ne mas opcion cu antes no tabata posibel na Aruba.

Mijntje van den Oever, kende ta un “Interventie Radioloog”, ta traha den e camber di intervencion unda ta haci uzo di “röntgen straling” y door di prik e ader, ta pasa un likido di contrast den e ader pa asina por mira riba pantaya precies unda e problema ta. Asina aki nan ta haci uzo di catheter y waya pa yega na e problema y resolve via un stent of balon.

Un ehempel grandi cu hopi biaha ta wordo opera ta un “slagader” tapa. Dr. van den Oever ta splica cu un “etalage been” por wordo trata na e manera aki. E persona cu tin esaki despues di cana un tiki  mester para un rato pa e spiernan por haya zuurstof pa despues por sigui cana. Hopi biaha esey ta un problema di “slagader” y por trata esaki cu intervencion di radiologia. Asina pashentnan por cana bek sin ningun keho. Otro ehempel ta pashentnan di dialisis cu tin un “shunt” na nan man cu despues di tempo esaki ta cera. Por trata esey door di pone balon pa asina suficiente fluho por pasa y asina por dialisa mas facil. “Ora no haci esey, cu tempo e ader tin “vernauwing” unda cu e ta bira mas chikito y e shunt ta cera di cual mester haci un operacion y esey nos kier preveni”, segun dr. van den Oever.

Dr. van den Oever hunto cu su colega dr. Robert van den Bos, tabata involucra den e proyecto aki pa evalua ki material mester pa por practica na un forma profesional. A percura pa tin e pantaya corecto, tin e contrast pomp corecto y un aparato di hala rosea cu den prome instante no a pensa riba dje. Tambe mester a  tene cuenta cu tur specificacion y cualificacionnan pa loke ta e “luchtstroom” y miho area di sterilisacion. A premira diferente aspecto y dr. van den Oever a provee tur punto necesario como un interventie radioloog pa tin un camber di intervencion completo y di ultimo tecnologia.

E renobacion di e camber di “interventie radiologie” ta un beneficio grandi pa Aruba. Awo por haci proceduranan dificil cu antes no tabata posibel den e camber di intervencion akinan na Aruba mes.  Pashentnan cu tin adernan cera bou di rudia por trata esakinan mientras cu antes por a traha solamente riba e problema di rudia parti ariba. Esunnan cu tin adernan cera den higra, por trata esaki sin cu tin di saca e higra completo. Tur esaki ta beneficionan pa Aruba. E grupo di pashentnan aki no mester bay afo mas pa busca tratamento pero por ricibi e cuido aki na Hospital mes.