Ministerio di Enseñansa, Siensia, Kultura & Deporte (E.S.K.D.) huntu ku Ministerio di Desaroyo Ekonómiko i UDC/CDC a uni forsa i organisá un seminario riba e tema Internashonalisá Enseñansa Superior.
Un di e retonan ku enseñansa mundialmente ta enfrentá ta Globalisashon. Regularmente nos ta haña ku nos sistema di enseñansa ta atendé ku idea, pensamentu, regla i leinan internashonal. Punto di bista i ideanan di hende di otro pais ta influensha nos manera di mira i pensa riba diferente tópiko ku tin hopi di aber ku nos enseñansa na nivel superior. Pesei Ministerio di E.S.K.D. a para ketu na e tema di internashonalisá enseñansa i wak kon por atendá ku esaki mihó den nos institutonan pa enseñansa superior. Internashonalisá ta enserá ku e proseso pa intergrá e dimenshon internashonal, interkultural i global den e kuríkulo di enseñansa sekundario i superior. Esaki ta krea un studiante internashonalmente kompetente ku por traha den nos merkado lokal i tambe e merkado internashonal.
Sr. Hans de Wit (Edukadó i profeshonal internashonal den e area di ‘Internationalization of Higher Education’ di Estado Unidos) tabata e orador prinsipal den e seminario i e’la tene un presentashon riba e tema pa tur presente. Sra. Susan Larmonie-van Heydoorn (Direktor di Maneho di M.E.S.K.D.) i sra. Zulaika Mook (Direktor di Sektor di Inovashon i Formashon na Desaroyo Ekonómiko) tambe a hiba palabra na tur e representante nan ku tabata tei presente. Institutonan manera ICUC, UDC/CDC, i IFE, nos institutonan di enseñansa superior, tambe a tene un presentashon kortiku di nan manera pa atendé ku e aspekto internashonal. Ministerio di E.S.K.D. lo dediká un kapítulo di nan maneho pa enseñansa superior na e tema di internashonalisá enseñansa i tambe inkorporá parti di esaki den nos lei pa enseñansa superior. E seminario aki ta e promé paso pa traha den estrecho kooperashon ku tur aktor i asina yega na un integrashon di e tema aki den nos sistema di enseñansa.
