Interact Club Aruba di Schakel College a instala directiva nobo pa 2020-21

346

Na cuminsamento di juli a tuma luga e instalacion di e directiva nobo di Interact Club Aruba di Schakel College. E anochi a cuminsa na unda cu President saliente Sufi Wadhwani a hiba palabra y duna un relato di locual Interact a logra e ultimo aña.

Ta na aña 2016 cu e club aki a wordo funda door di Rotary Club Aruba, na unda e Interact Club of Aruba ta specificamente pa e alumnonan di Schakel College. Durante añanan e club a sa di crece y awor aki ta conta cu 48 miembro hopi activo den nos comunidad.

Na september 2019 Interact a uni su mes hunto cu e resto di famia di Rotary aki na Aruba pa hasi e Bachelor’s Beach limpi durante e proyecto di “beach clean-up” di Aruba Reef Care Foundation. Na oktober 2019 Interact a cuminsa un campaña di conscientisacion over di End Polio Now na Schakel College, na unda cu miembronan a hasi diferente presentacion tocante e proyecto aki di Rotary International. Tambe a recauda fondo door di bende “wristbands” di End Polio Now. E fondonan aki a wordo deposita pa e initiativa di Rotary International pa combati y erradica polio na mundo.

Na luna di november, Interact mundialmente a celebra 58 aña di existencia. Pa celebra esaki Interact a organisa un asina jama “Spirit Week” na Schakel College. Cada dia tabata tin un tema diferente pa asina duna atencion na e club y proyectonan realisa. Tur alumno di Schakel College a participa na esaki y tabata un exito total.

Como parti di un organisacion internacional ta importante pa pone Aruba tambe ariba mapa. Asina aki e miembro nan di Interact a dicidi di manda un video pa conta over di Aruba, Interact, Schakel College y e proyecto di “beach clean up”. Nos mester bisa cu e video di Interact Aruba a wordo escogi como e top 8 video nan rond mundo. Sigur un logro grandi ja cu tin mas cu 20.000 Interact Clubs rond di mundo.

Na december aña pasa Interact a hasi un proyecto “The Magic of Kindness”. Pa un paar di weekend miembronan di Interact a collecta differente productonan na Ling&Sons y despues haci un donacion di esaki nan na Fundacion pa Nos Comunidad. Tambe a collecta differente articulo nan na scol mes cu ayudo di Basisschool de Schakel y hasi un donacion na Hand4Addicts.

Aña 2020 a cuminsa cu dos proyecto na Schakel College na unda a organisa un anochi pa e alumnonan di Schakel College pa asina duna mas informacion tocante estudio y carera. Miembronan di Rotary y Rotaract Club Aruba tambe a participa na esaki pa asina duna mas informacion na e alumnonan. E di dos proyecto tabata incera “Make Someone Happy” ariba dia di San Valentino. Alumnonan por a hasi nan bestelling di rosa, koekie of saco di mangel pa un persona special. Dia 14 di februari e miembronan di Interact a reparti esaki nan.

Despues di esaki a sigui un periodo hopi dificil na Aruba. Door di e pandemia covid-19 e plannan y proyectonan di Interact mester a wordo posponi. Asina mes e miembronan di Interact Club no a para keto. Hunto cu Rotary y Rotaract Club Aruba y tambe Interact Colegio Arubano a participa den e initiativa di “Happy to Give Back”. Tambe a yuda como voluntario varios biaha na Centro Kibrahacha na unda a yuda paketa cuminda y productonan pa Fundacion pa Nos Comunidad. Den juli e proyecto pa colecta productonan pa Fundacion pa Nos Comunidad a sigui y den siman a hasi donacion di mas di AWG 3500,- na producto cu a wordo colecta na Schakel mes.

E club ta mira bek na un aña hopi activo y impacto grandi pa nos comunidad. Nan esfuerso a wordo reconoci tambe door di Rotary International na unda cu President Sufi, su directiva y henter Interact Club Aruba di Schakel College a ricibi un reconocemento di “Presidential Citation, with Platinum Distinction”. 

E miembronan di Interact ta varia di 12 pa 18 aña y tur ta alumnonan di Schakel College. Con jong nan por ta, nan a sa di tuma initiativa y responsabilidad pa organisa diferente proyecto na bienestar di e comunidad di Aruba. Esaki tur no por tabata posibel sin e sosten cu nan ta ricibi di parti Schakel College. Maestronan di Schakel College Melany van Trigt – Tweeboom y Andreina Krosendijk ta forma parti esencial pa guia e Interactors hunto cu e miembronan di Rotary Club Aruba Shelby Maduro y Frederick Nuboer.  

Awo ta turno pa Daviënna Koolman, kende a wordo instala como President di Interact Club Aruba di Schakel College pa 2020-21. E otro miembronan di directiva ta Isabella Ingwersen (Vice-President), Mia Harms (secretaria), Michiel Kamp (tesorero), Effi Abath (fundraising), Mandy Kelkboom (relacionista publico y miembrecia), Maya van der Kruit (fellowship) y President Saliente Sufi Wadhwani. 

Interact Club Aruba di Schakel College kier a gradici tur esnan cu a aporta di un manera of otro na e proyectonan. Sin boso contribucion y sosten esaki no tabata posibel.