Un total di 10 homber di nacionalidad Venezolano a fracasa awenochi den un intento pa subi tera na Santana di Cacho na San Nicolas. E ilegalnan ta den man di Polis, mientras cu e boto y capitan Venezolano ta den man di Warda Costa di Caribe Hulandes, cu a gar’e durante su trayecto bek pa Venezuela.
Tabata mas o menos 11:15pm cu Polisnan a activa mesora ora un patruya di San Nicolas a topa cu ilegalnan purbando pa subi tera na e beach conoci como Santana di Cacho den Lago Colony net despues di Baby Beach. A saca e hombernan for di awa cu tur nan saconan yena cu paña y transporta nan pa Warda nos Costa pa regla nan deportacion mesora bek pa Venezuela.
Como cu nan no a yega na waf of Aeropuerto, di forma legal, ta haci dificil pa nan pidi asilo politico. E maneho nobo di Minister Andin Bikker y Warda nos Costa ta encera tambe cu pa pidi asilo, pa haya e status di “refugiado” cu mester yega na frontera directamente for di e pais encuestion. Bisando esey, Migracion ta nenga tur peticion di Venezolanonan cu sali for di Venezuela, pasa Colombia of Panama y bin pidi pa asilo na Aruba.
Awor tin dos trayecto canando den forma simultaneo. E prome ta contra e 10 hombernan cu a purba subi tera den forma ilegal, nan no a comete un crimen. Warda nos Costa lo mester regla nan deportacion mesora pa Venezuela, primeramente via boto mesun cos cu nan a yega, of si nan mes tin placa of famia kier paga pa nan, lo por manda nan cu avion bek. Tin biaha e proceso ey por tarda algun dia of siman, di cual nan ta keda cera na Warda nos Costa durante tur e dianan.
Di otro banda, e capitan si tin un problema mas serio. Ta acusa e di “Mensenhandel / Mensensmokkel”, cu si ta un acto criminal cu castigo di prizon halto mara na dje. Warda Costa ta haci e prome investigacion y ta traha e prome rapport cu ta bay pa Polis cu ta tuma e investigacion over. E capitan si ta bay cera na Warda di Polis, ta wordo procesa pa un Fiscal y un Hues Comisario ta supervisa e proceso te ora e yega Corte.
E trabou awe a bay den forma di un bon combinacion entre Polis y Warda Costa di Caribe Hulandes. Nan tabatin avion y helicopter mesora na e sitio, mientras cu nan botonan a activa mesora y a para e boto den su intento di huy pa autoridad local. E helicopter di Polis tambe a participa, mientras cu varios patruya di Polis a bay pa duna un man, pero e patruyanan di San Nicolas mes a efectua e detencionnan y tabatin e ilegalnan bou di control.
