Diadomingo anochi algo prome cu 12or a bati alarma pa un caso di Atraco den Rancho. Varios unidad di Polis a bay pura na e sitio. Na yegada e cos tabata mustra poco bruha. A kere despues ta un accidente y un hende kier a core bay na pia. Polis a cuminsa acumula informacion. A resulta cu ta trata di un homber cu a bay den Rancho cu su Honda SUV.
Segun bisiñanan mas biaha nan sa mire den e area den e zona poco bruha. E biaha aki el a pasa y a ser ataka pa un hende cu cuchiu. Parce nan kier a atrake. Un homber cu cabey medio rasta. Den e intento pa atraca cu cuchiu e atracador a coy e auto di su victima y sali bay. Den e proceso el a perde control dal den un auto pabou di Hotel Baccarat. Bisiñanan cu a tende grito y scucha sla a core sali pa wak kico ta pasando. E supuesto victima a core bay pidi ayudo na bisiña.
E tabata asina spanta cu e no tabata para keto y kier a bay pasobra el a kere cu ainda nan no bin pe cu cuchiu. Polis a yega y a base di e informacion y descripcion duna a drenta e famoso cas na e skina di Ranchostraat cu Visstraat. Eynan a logra haya e supuesto atracador y el a admiti tambe di a dal e auto. Kiermen e mes ta esun cu a saca cuchiu tambe.
E cuchiu grandi a keda den e SUV despues di e accidente. Polis a detene e sospechoso. A pidi pa Atraco Team y Cuerpo Tecnico. Tambe a pidi pa slachtofferhulp pa asina asisti e victima. A base di e interogacion di ambos lo saca afo ki tur a sosode. No sa precies si den e proceso di atraco a logra bay cu algo di e victima. A nota si cu e tabata herida cu algun golpi na curpa.
