Awe tardi 6:00pm a yama un reunion urgente cu candidatonan di partido POR pa un reunion na nan sede na Dakota. Parce cu a trata e problemanan serio cu tin den partido. A invita tur candidato, aunke ta un rato prome cu e reunion, cu speransa cu esun cu nan kier, lo no presenta. Y a logra tambe, pasobra Minister Marisol Tromp no a presenta na dicho reunion, den cual su nomber a skeiro for di cuminsamento te final.
Un di e retonan mas grandi cu a atende durante e reunion interno ta cu supuestamente Minister Marisol Tromp no ta sigui instruccion di Ex-Minister Otmar Oduber. E ultimo a anuncia su retiro di Gobierno y politica na december 2019. E lo tabata cla pa bay biba den un finca na Medellin, pero parce cu a cambia di idea na caminda.
A opta pa keda Aruba, drenta Hunta di Comisario di Refineria di Aruba y a bira consehero di Minister Andin Bikker. Awor e ta purba maneha e dos Ministerionan al estilo “Consehero General” di Gobierno, cu tur poder pero sin responsabilidad. Un scenario cu nos a conoce den añanan 80 pero cu dificilmente por logra awendia.
E problema awor ta cu e lider a perde control riba Minister Marisol Tromp. E lo kier a sigui maneha su cartera tras di cortina pero e mandatario no ta permiti esaki. Minister Tromp a para hopi asunto dudoso y decisionnan cuestionabel na Serlimar. A kita varios di esunnan yega na ex-Minister Otmar Oduber cu tabata ocupa puestonan clave.
E reunion cu candidatonan tabata pa fiha con lo actua contra Marisol. Kier cera cabes y eventualmente exigi, segun statuut, e retiro di Minister Marisol Tromp. Tin candidato cla caba pa drenta na su lugar. Si e no retira, lo purba cera aliansa cu MEP y RED den Parlamento pa un mocion di desconfiansa.
Lo purba haci tur esfuerso pa Gobierno no bay cas. Coalicion ta mal bruha y mas bien ta bringa pa keda sinta. Coalicion den Cocolishi y den Parlamento no ta uni. Lo keda pendiente pa mira kico e resultado di e reunion lo bay ta.
