Instituto Medico San Nicolas lo ta un trendesetter den Latino America y Caribe

Minister di Salubridad Publico, Dangui Oduber, a haci un recorido den ImSan. Ta trata aki di un proyecto cu ta casi cla. Falta algun detayes pa e proyecto ta entrega den su totalidad. Ta trata aki di un inversion di 60 miyon florin cu lo genera un gran cantidad di empleo pa e comunidad di Aruba.

Mas of menos 50 empleo ta wordo genera. E minister a keda sumamente impresiona despues di e bishita aki, caminda e ta felicita e director dr. Joel Rajnherc y tambe e ekipo cu a traha riba e proyecto aki.

Ta un centro di cuido medico State of the Art, Aruba ta bay haya na momento cu e proyecto ta full operacional.

Minister Dangui Oduber: Lo trata 85% di e pashentnan cu ta bay exterior pa radiotherapia na Aruba mes

Minister Dangui Oduber: Lo trata 85% di e pashentnan cu ta bay exterior pa radiotherapia na Aruba mes. Click e link pa mas https://24ora.tv/2FyYyzT

Posted by 24ora on Thursday, January 9, 2020

A pasa na e Spoed Eisende Hulp nobo cu a keda renoba. A pasa tambe den e salanan di operacion, dos di e tresnan ta completamente nobo cu lo ultimo di tecnologia. E ta inclui un sala di operacion di wowo cu ta masha moderno mes.  

Un area cu e director di ImSan, dr. Joel Rajnherc ta mas orguyoso di dje ta e parti di Radiologia – Radioterapia, cual e ta considera como e diamante di henter e proyecto aki.

Por mira e ekiponan cu tin cu a wordo poni den ImSan e momentonan aki, ta ekiponan cu no tin den henter Latino America, ni den Caribe. Aruba ta e pionero den esaki. Ta ekiponan cu Aruba so tin. Ta inversionnan cuantioso cu a haci pa drecha y mehora e cuido medico cu ta brinda na nos ciudadanonan. Como minister di Salud, Dangui Oduber ta sumamente orguyoso di e desaroyonan aki.

Pero cada ciudadano cu ta biba riba e pais aki, no solamente Gobierno y Minister, pero cada Arubiano mester sinti su mes orguyoso pa tin un centro di cuido medico di e nivel aki cu ta wordo brinda na ImSan. Un nivel haltisimo cu ekiponan hopi moderno, di ultimo tecnologia, cu hopi biaha ni na otro paisnan grandi no tin e ekiponan aki.

Por ehempel tin un bon cooperacion y acuerdo cu Baptist Health y nan mes ta siña di e desaroyonan cu tin na Aruba. No solamente Aruba ta siña di nan. Esaki ta demostra cu e manera con ImSan ta wordo maneha, ta demostra vision.

ImSan no a yega caminda cu e ta y tin mas plan na caminda. Esaki sigur ta un bunita proyecto cu lo finalisa dentro di poco. Minister Dangui Oduber a felicita dr. Rajnherc pa e vision cu e tin pa ImSan,

Gradiciendo tur trahado y sigur ta un noticia sumamente positivo pa cuido medico en general na Aruba. E centro di Radioterapia cu lo bira operacional, no mester manda pashentnan mas afo pa haya bestraling. Sino aki na Aruba mes, den cercania di nan famia, nan por wordo trata y cuida. Sigur esaki ta un adelanto enorme pa cuido medico na Aruba y lo yuda reduci e gastonan di AZV.

Un trendsetter

Dr. Rajnherc sigur ta sumamente contento y orguyoso cu e bishita di Minister Dangui Oduber y a relata cu ta yegando den e ultimo lunanan di e renobacion y ampliacion di Instituto Medico San Nicolas.

E ta un proyecto sumamente complica. Tabata tin un centro medico funcionando y mester sigui brinda e mesun servicio. Apesar di esey mester haci construccion y renobacion y trece tur sorto ekipo nobo y haci henter revision di e sistema di network di internet, di nan sistema di comunicacion na e mesun momento.

Tabata tin hopi hende envolvi den e proyecto aki y ta masha orguyoso riba tur e hendenan cu a traha riba dje.

Cu gran placer pa ImSan cu hopi di e dunadonan di servicio di cuido medico, e specialistanan medico, e enfermeronan, a join na ImSan pa sigui duna un servicio di cuido medico lo miho posibel na Aruba.

Esey ta haciendo en cooperacion cu Baptist Health of South Florida, cu ta yudando pa por yega na un calidad di servicio di un JCI cu ta un Joint Commission International Accreditation cu ta un marca mayor pa demostra cu bo ta trahando na nivel y calidad y siguridad di servicio pa bo pashent.

Dr. Rajnherc ta sigui bisa cu p’e ta un orguyo pa representa e trahadonan na ImSan. A crece den e ultimo añanan masha hopi y ta sigui crece. E final di e proyecto mester ta aproximadamete fin di maart, unda cu ultimo parti no clinico ta wordo entrega. E ora por bisa cu ta completamente cla cu e fase di renobacion y expansion.