Tur cos ta cla pa pronto e departamento di Inmigracion, situa den e localidad den Vondellaan, muda pa un edificio den Emanstraat. Lo bay den e edificio cu decadanan atras tabata Voogdijraad y hasta Censo.
Un tempo el a bira un negoshi priva y ariba tabata un lodge. Mientrastanto e luga a para bashi pa basta tempo. Hasta mester a cera esaki pa e no bira choller house. A horta diferente articulo for di e edificio, cu na dado momento tabatin mester di un renobacion.
Gobierno di AVP a bin cu e plan pa hunto cu sector priva inverti y renoba edificionan para sin uzo. Asina a bin cu Stadsherstel di Hulanda.
A lanta Renobacion Aruba NV. Eynan doño di e edificio di ex-Voogdijraad den Emanstraat a bira, Gobierno, APFA, Aruba Bank, CMB, FATUM, ENNIA, Romar Trading y Serge Mansur. Serge Mansur tabata na cabes pa trek e proyecto. E ta presidente of director di Renobacion Aruba NV.
E proceso a tarda basta pasobra ta ideanan y plannan presenta for di tempo di AVP den combinacion cu sector priva. Finalmente a mira su fruto awe. E luga a keda nechi y pronto lo muda Inmigracion pa e localidad nobo.
Inmigracion den Vondellaan ta uza e localidad aki pa nan bedrijfsvoering. Tambe Tourist on Business, Garantie verklaringen, toeristen verlenging, formulario pa biaha cu menor y Online ED card.
E edificio nobo ta grandi suficiente pa por acomoda tur e departamentonan di Migracion Aruba. E departamento di gobierno lo huur un parti for di Renobacion Aruba NV. No ta conoci ainda cua otro departamento lo huur e otro parti di e mesun edificio. Dia cu nan muda oficialmente e hefe di Migracion Aruba lo anuncia esaki.
