E ingeniero yiu di tera, Ing. Robert “Rob” Henriquez por sali cu un sentido di orguyo grandi for di nos compania nacional di distribucion di coriente, esta NV Elmar. Su logronan lo papia pa nan mes, mescos ta e adelantonan grandi den tur sentido di palabra pa NV Elmar. Awendia den Caribe ta considera NV Elmar un berdadero storia di exito, specialmente pa e logronan grandi den infrastructura, operacion y tecnologia moderno.
Ing. Rob Henriquez a traha 10 aña den refineria Valero, despues di a caba di studia. El a cuminsa su carera na NV Elmar na aña 2009, lagando su funcion di Super Intendent den Maintanance, e parti di coriente di henter e refineria. El a participa den un proceso di reclutacion na NV Elmar di cual mas cu 40 ehecutivo a solicita y Henriquez a sali como e miho.
Na NV Elmar el a tuma e funcion di Director for di Nelo Loefstop, kende tabata director interino despues cu a kita Freddy Rafine for di trabou. Ing. Rob Henriquez a drenta dia 1 di juni 2009, bou maneho e tempo ey di Efraim de Kort como Presidente di Hunta di Supervision di Utilities Aruba NV, WEB Aruba NV y di NV Elmar pareu! Henriquez na tur a keda den e funcion pa algo mas cu 9 aña.
Awor na salida di Rob Henriquez for di funcion, por mira atras na un transicion grandi di luznan di caya for di e sistema ineficiente HPL, di consumo halto, pa e sistema di luznan LED. Ta papia di 12 mil luz di caya pa henter Aruba. E cambio a traduci den menos consumo di coriente. E unico cos cu a traduci e reduccion den mas luz, pues di 9 mil luz di caya, cu e reduccion di consumo, a his’e te na 12 mil luz di caya.
Un otro exito ta e proyecto di parke solar, e prome di e magnitud aki den henter Caribe. E proyecto net dilanti di Aeropuerto, a comberti den un icono di tecnologia berde. Cu mas o menos 14 mil panel solar den forma di un afdak pa e autonan, e proyecto ta produci 3.4 megawatt di coriente. E coriente aki no ta bay pa Aeropuerto, sino ta drenta bek den e red di distribucion di NV Elmar.
E proyecto di Smart Meter tambe ta un otro exito di Rob Henriquez. E sistema di meternan inteligente ta duna e cliente hopi beneficio, manera un miho control riba Bo gasto di uzo. Pa NV Elmar tambe e meternan moderno aki ta permiti comunicacion interactivo, por ehempel no mester pasa tur luna pa tuma e “meterstand” pasobra e meter mes ta manda notifica NV Elmar. E sistema tambe a trece cune un sistema mas moderno di meternan prepago, cu mesora a bira un exito rotundo entre clientenan di NV Elmar.
Rob Henriquez a percura pa haci un cambio grandi den e CAO cu e trahadonan. Den esey a yega na acuerdo cu sindicatonan pa introduci un blafon di salario pa cada posicion den NV Elmar. E sistema di crecemento automatico a pone por ehempel cu tin dos empleado den e compania cu tin un salario mas halto cu e director! Un cahera ehecutivo por ehempel ta gana 17 mil florin pa luna, basa riba crecemento natural di su salario anualmente, sin cu tin un blafon. Esey awor a cambia, aunke cu e sindicato nobo a exigi cabes di e director pa e mesun motibo aki.
Na final por bisa cu como Arubiano, ta lamenta cu pa rasonnan puramente politico, ta “bula cabes” di un experto local. Tur su estudio, preparacion y experencia diripiente no ta conta mas, si no tin e contacto politico necesario pa mantene su trabou. Ta desee tur clase di exito den futuro.
