Riba dia 29 di september ultimo, exactamente un siman despues di eleccion, Gobernador Boekhoudt a apunta mr. Arie Swaen como Informador di e siguiente coalicion cu lo mester goberna nos pais den e 4 añanan nos dilanti. Awe el a entrega su rapport, despues di a papia cu e 4 partidonan cu a haya voto pa tin representacion den Parlamento. Tambe a papia cu otro instancianan, a haya diferente rapport di nan, cu tambe a bay na e partidonan.
Gobernador a ricibi awe e “verslag” di Informador. Gobernador lo mester dicidi si esey lo bira e “tussenverslag” of e lo haci’e mesora e “eind verslag”.
Kico lo sosode, si Gobernador lo nombra un Formador mesora, ainda no ta conoci. E Informador ta kere cu esey ta keda na Gobernador pa dicidi. Den caso Gobernador tuma e rapport como final, mesora e tarea di Informador ta caba y e ora lo mester nombra un Formado. Mayoria bes ta un politico ta bira Formado, pa forma e siguiente coalicion.
