Independisacion di DPS: Un idea dificil pa bende

1004

Ta trata aki di un proyecto, presenta awe pa un profesional di Belgica hunto cu Minister Dr. Rudy Lampe na e Comision Fiho di Enseñansa den Parlamento. Mayoria Parlamentario a haya henter e proyecto “too good to be true” pero na final e percepcion di tur ta cu e ta dificil pa bende. E fraccion di AVP siendo oposicion ta den un posicion mas facil, pero e tres fraccionnan cu ta forma coalicion mes tin preguntanan y preocupacionnan cu ta haci e proyecto aki “dificil” pa Gabinete Wever-Croes.

E atendencia awe na e reunion tabata masha bon mes, mas cu normal. Pa e fraccion di MEP, casi tur hende tabata presente, pues lider di fraccion Rocco Tjon, Hendrik Tevreden, Shailiny Tromp, Endy Croes, Edgar Vrolijk, Sue-Ann Ras y Setty Christiaans. Mester menciona cu ni Ady Thijsen ni Daphne Lejuez no a atende e reunion. Di parti POR tabata presente Marisol Lopez y Alan Howell mientras cu Ricardo Croes tabatey pa RED. Di oposicion, esta fraccion di AVP a atende Marlon Sneek como Lider di fraccion, Robert Candelaria,

Jennifer Arends y Mervin Wyatt. Ausente tabata Benny Sevinger, Mike de Meza, Arthur Dowers, Richard Arends y Michael Lampe.

Despues di e presentacion a sali e preguntanan, mayoria di coalicion mes, cu a cuestiona e idea aki. Despues di mas cu 30 aña cu a funciona cu Dienst Publieke Scholen, awor kier haci’e un fundacion mescos cu SKOA. Den e cambio aki, 1070 docente y empleadonan administrativo lo pasa di ta Ambtenaar pa ta empleado di un fundacion.

Segun Gobierno, nan lo bay dilanti cu e cambio aki. A splica cu e Minister di Enseñansa awor tin dos petchi bisti y ta mucho poderoso. E fraccion di AVP a splica cu no ta corda cu den 30 aña un Minister a mete den operacion di un scol, den dunamento di les of si ta laga un studiante bay over of no. Semper esey a keda den man di scol mes. Awor Minister Rudy Lampe kier hinke den un fundacion y ora a puntre ken lo nombra e directiva di e fundacion, el a contesta cu ta e mes…pasobra nan mester ta hende cu ta aplica su maneho. Ora a bise cu e miembronan lo cambia ora bin cambio di gobierno, el a contesta cu no, lo nombra nan pa mas cu un periodo di gobernacion. Esey ta precisamente locual e Gobierno actual mes ta bringando awor.

Ora cu a sinti cu e discusion a bira mucho cayente den e reunion, e actual Minister di Enseñansa a aclaria cu esaki no ta su maneho, sino e ta cumpliendo cu locual a acorda den acuerdo di gobernacion entre e tres partidonan. Ta obvio cu den MEP mes nan no tabata mucho na altura di e condicion aki pa forma Gobierno.

Na final e Parlamentarionan di coalicion a bisa Minister Lampe pa e mira con e ta bay afo y bende e proyecto aki pasobra awor aki nan ta hayando hopi critica di tur esunnan envolvi. Ta obvio cu e reunion cu sindicatonan no a duna su frutonan pasobra nan no a comunica of bende e proyecto ainda cu nan miembronan. Ta mustra hopi cla cu si e docentenan lanta, cu e coalicion no por wanta e cayente.

Di otro banda, e Minister a splica e Parlamentarionan cu el a scoge e ruta rapido y drastico aki pasobra si e lo a bin Parlamento prome pa scucha 21 opinion diferente, cu hamas e proyecto lo inicia. Awor si tur cos bay bon, dia 1 di januari 2019 DPS lo no resorta mas bou Minister di Enseñansa, sino bou di un fundacion, di cual e Minister lo nombra tur e miembronan di supervision eyden.