Incumplimento cu contract: Polis sin Helicopter pa algun dia caba

Lo ta bon pa Minister di Husticia, mr. Andin Bikker bin splica dicon e helicopter di Polis no ta na Aruba. Un helicopter cu ta costa Aruba casi 200 mil florin pa luna sin cu a yuda soluciona ningun crimen.

E crimennan cu tin ta mesun team di Polis ta solucionando esaki cu entradanan hudicial sea marduga of den dia. Si bo tin un contrato, bo mester percura pa 24/7 tin un helicopter disponibel pa cumpli cu e contract.

Pa algun dia caba a mira cu e Helicopter a bandona Aruba. No ta conoci si el a bay pa keda of el a bay pa service. Ademas e helicopter no ta bulando bou registracion di Aruba. Tampoco e asuntonan fiscal te recien no tabata na ordo. Ta hopi cos e compania SADI ta fayando cu nos leynan y Gobierno ta permiti tur esaki tambe! Si ta un yiu di tera, lo a atende cune masha dia caba.

Desde cu e helicopter a bin, no a mira ningun logro den su trabounan desplega. Al contrario, pueblo mas bien ta spanta ora cu nan sinti cierto orario di dia e helicopter ta bulando den cierto bario comosifuera tin algo pasando. A tende cu apart di e contrato di e helicopter tin mas gastonan envolvi pafo di e contrato. Tur e asuntonan aki Minister lo mester sali splica pa Aruba por haya sa cu ta e suma total cu henter e proyecto di helicopter ta costa caha di pueblo.

A mira tambe cu na Tanki Flip a arma un tanki gewoon asina riba palet pa fuel e helicopter. Ni cu esey SADI kier cumpli cune, manera den pasado, cu e otro compania tabata cumpli cu tur regla di siguridad y di Aeropuerto. Na Kazerne di Bombero unda siguridad mester tey, a djis arma un tanki di fuel con cu ta y cera un contrato tras di lomba di otronan pa yega na combustibel pa e helicopter.

Loke ta importante awor aki ta pa haya un splicacion riba e asunto di ausencia di helicopter y dicon ora cu el a bay no a pone un otro pa keda pendiente. Dia cu e helicopter a bin Aruba, a laga sa cu esaki no ta esun oficial. Un otro lo bin pa reemplasa e helicopter actual cu ta uno uza pa un planta di television di Colombia.

Lo keda pendiente pa un aclareacion di Minister di Husticia cu den mesun rosea por splica e costo total y aclarea tambe e asunto di fuel na Tanki Flip y siguridad pa aviacion general.

Comments

comments