Diamars un caso hopi tristo a sosode na Santa Cruz. Un wela a bati alarma cu e no ta mira su tres nietonan pa algun dia caba. El a bati alarma cerca grupo contra abuso di menor. Nan no a para keto. Nan a move shelo y tera. A bay na Polis pa asina splica kico ta pasando. A prepara un team pa asina bay na e adres na Sabanilla Abou den Santa Cruz. Segun informacion e mama di un hende special y ta biba of tin un relacion cu un homber A.H. conoci di polis cu ta bende y usa droga.
Ta sospecha cu e mama ta semi special tambe ta usando droga. E forma di biba ta hopi malo. Ora cu e grupo a yega na e adres pa mira e situacion a bin topa cu e tres criaturanan cera den un cuarto di tabla patras di un trailer. Mesora a liberanan y asina wak e situacion na e cas. Autoridad a dicidi di bay cu tur tres mucha warda di Polis na Santa Cruz. A notifica instancianan manera slachtofferhulp y tambe Voogdijraad.
Ta di dos biaha cu polis ta handle e situacion di e muchanan. Recien e muchanan a keda como un siman den un instancia special pa proteccion di mucha. E biaha aki si nan no tabata tin mesun suerte. Diamars atardi laat birando scur a haya e muchanan na bida Danki Dios pero desnutri y deshidrata y tur soda. E muchanan nan edad ta varia entre 7 aña cu ta un yiu special, otro di 5 y 4 aña cual un di nan tin un problema di salud cronico tambe.
Ora cu a bay cu nan warda di Polis y a yama entre otro Voogdijraad a resulta cu Voogdijraad si no ta haya cu e muchanan ta den un situacion di peliger. Nan a entrega e tres muchanan bek na e mama. E cos ey a laga tur hende cu un rabia interno. Pa mas cu un siman no ta mira e muchanan y ta hayanan cera den cuarta di tabla y Voogdijraad ta djis laba man y entreganan bek na e mama. Hopi tristo con Voogdijraad ta funciona. Hopi biaha ta cuestiona publicamente e maneho di Voogdijraad y claramente por mira cu hendenan ta haya rason.
Pa anochi 11or diamars e muchanan a bay bek den e ambiente malo cu e instancianan y Polis a hayanan aden. E homber A.H. no ta tata di e muchanan pero ta biba cu e mama. E mesun homber aki a perde su yiunan den pasado ora a haye ta biba cu su pareha e tempo ey cu e yiunan banda di lama den un Rancho. Esnan cu sa ta bisa cu e ta maltrata e muchanan tambe. Kico ta warda. Aruba pasa den un situacion di crisis pa loke ta proteccion di mucha. Parce cu tin un otro instancia cu hasta a bay asina leu di cuestiona e accion cu e wela a tuma pa bati alarma.
Nan kiermen cu nan mes tabata atendiendo e caso. Parce cu e instancia of fundacion aki ta warda e baca hoga pa despues lamenta. Diahuebs pa 4:30 di atardi lo tin un conferencia di prensa cu e Grupo “Ta Basta” cu lo bay comenta riba e caso tristo aki. Aki lo trece dilanti e realidad cruel cu a topa na Sabanilla Abou y e forma cu instancianan cu mester ta serio a atende e caso tristo di e tres criaturanan aki.
