Den e discurso nacional dialuna nochi Prome Minister Mark Rutte a uza e terminologia “groepsimmuniteit”, como algo cu por frena e plamamento di coronavirus mientras cu no tin vacuna of remedi na man pa combati’e. Kico ta encera “groepsimmuniteit” exactamente y pakico e ta importante”
Rutte a splica esaki hopi bon den su discurso: “Esun cu a haya e virus, despues di esey mayoria biaha ta immuun. Mescos cu antes cu sarampi. Mientras mas grandi e grupo cu ta immuun ta, menos e chens ta pa e virus plama pa e grandinan vulnerabel y personanan den un estado di salud debil.”
“Cu “groepsimmuniteit” ta construi manera un muraya di proteccion rond di nan. Esey ta e principio,” el a bisa.
Lo por dura algun luna of mas prome cu crea e “groepsimmuniteit”, Rutte a adverti. Te cu e momento ey, ta keda importante, segun e Prome Mandatario, pa protege mas tanto posibel e hendenan cu mas riesgo ta core, manera e grandinan vulnerabel y persona cu problema cu nan estado di salud.
E hendenan mester haya virus pa construi e “groepsimmuniteit”
Pa crea immunidad, mas tanto hende posibel mester haya e coronavirus. Debi na esaki, un prohibicion total pa subi caya no tin sentido, expertonan ta conseha. Banda di esey, e chens ta grandi cu asina mes hopi hende lo bira malo, asina cu anula e “lockdown” ey.
Pa e motibo ey Gabinete di Mark Rutte a dicidi pa e scenario unda nan ta scoge “pa controla e virus mas tanto posibel”. Esaki ta encera, segun Rutte, cu ta trata di controla e cantidad di contagionan y plama nan riba un periodo mas largo. Cu e maneho aki, unda cu mayoria di persona lo sufri di sintomanan leve, ta traha pa subi e immunidad y lo percura cu sector di salud por atende cu e casonan existente.
Cera henter e pais, por mustra un escogencia atractivo, pero “den e scenario ey nos lo mester pone nos pais plat pa un aña y kisas mas latgo, cu tur e consecuencianan cu e ta trece cun’e,” segun Rutte.
Hefe di RIVM
Jaap van Dissel, hefe di “Rijksinstituut voor Volksgezondheid en Milieu” (RIVM), dialuna anochi a bisa cu mas o menos 50 pa 60 porciento di Hulandes lo mester haya e virus pa logra yega na un “groepsimmuniteit”. Segun Van Dissel, mester laga e virus bay rond bou di personanan saludabel cu llo no wordo afecta mucho p’asina esnan mas debil wordo protegi. “E situacion ta pidi pa solidaridad,” el a bisa.
Asina mes e medidanan tuma door di Gobierno tabata necesario. Pa logra yega na un “groepsimmuniteit”, segun Van Dissel, esaki mester tuma luga di un forma controla, p’asina no demasiado hende keda afecta na mesun momento, cu e sector di cuido no por atende cun’e.
