Ilegalnan ta sigui huy for di Warda nos Costa

Awe tardi pa mas o menos 6:00pm a bati alarma na Polis pa un detenido ilegal cu a huy for di e compleho di celnan di Warda nos Costa na Dakota, unda antes tabata Huis van Bewaring. Regularmente Polis mester “versterk” e personal di Warda nos Costa pa ilegalnan agresivo of cu ta huy awor cu regularidad for di ambos edificio, e nobo y esun bieu na Dakota.

Ta trata di e homber Guillen Vicente Jose Miguel, di nacionalidad Dominicano cu recientemente a sali for di K.I.A. despues di a caba di sinta su castigo y lo ta, wardando riba su expulsion for di nos isla.

Un patruya di Polis a presenta na Warda Nos Costa pa haya mas informacion di e ilegal cu a huy. Aparentemente e fugitivo ta hopi agresivo. Polis a cuminsa cu un buskeda.

E detenido ta di cuero color bruin, cabey rasta, cu barba, bisti cu un T-shirt color blanco y short color blauw. El a sali core bay direccion Dakota. Ultimo cu a mir’e tabata banda di Bohama.

No ta prome biaha cu detenidonan ilegalta huy for di e facilidadnan di Warda nos Costa. Ta parce cu e medidanan di siguridad no ta na e nivel desea of e personal no ta entrena of tin e ekiponan y/of e autoridad pa por garantisa cu presonan no ta scapa.