Ilegalnan cera den Huis van Bewaring na Dakota tambe a subi dak: “Nos kier libertad”

1893

Ilegalnan dera den Huis van Bewaring na Dakota a drenta den accion diaranson mainta. Mescos cu e grupo grandi di esunnan indocumenta cera den edificio di Guarda Nos Costa na Sabana Berde (Banda di Brandweer) a mustra nan malcontento, esunnan cera na Dakota tambe a haci mesun cos. Nan a para pafo y a cuminsa grita cu nan kier nan libertad, pero tambe a haci uzo di materialnan, fluit pa haci desordo.

E ilegalnan aki ta sperando nan deportacion, di cual algun di nan ta cera pa lunanan largo caba. No ta conoci cuanto indocumenta Guarda Nos Costa tin pendiente pa deportacion. E indocumentanan aki a cuminsa bay den accion, pa motibo cu kier trece padilanti e trato inhumano cu nan ta ricibiendo.

Ilegalnan a subi dak di Huis van Bewaring

Posted by 24ora on Wednesday, July 22, 2020

Manera cuater ilegal na Sabana Berde a subi riba dak, na Dakota 3 ilegal femenino a haci mesun cos. E indocumentanan tin lunanan sperando nan deportacion, pero nan no ta hayando oido riba nan situacion y un contesta di ki dia lo deporta nan bek pa Venezuela.

E Consul General di Venezuela cu ta staciona na Aruba, no ta riba e isla pero ta pega na Venezuela. El a opta pa no regresa ainda y na su luga tin un Vice-Consul. A busca contacto cu e Consulado di Venezuela pa haya mas informacion riba e situacion di esunnan deteni pa Guarda Nos Costa, pero no ta hayando un contesta. Gobierno di Aruba ta yamando e Consulado pa papia riba e situacion di nan ciudadanonan Venezolano, pero sin contesta of accion di parti di e representantenan diplomatico di Republica Bolivariana di Venezuela.

Ilegalnan na Huis van Bewaring den accion

Posted by 24ora on Wednesday, July 22, 2020

Minister di Husticia, mr. Andin Bikker tambe a papia riba e situacion aki, buscando solucion con por yega na baha e cantidad di ilegalnan pendiente nan deportacion. Aunke cu a bin vuelonan humanitario for di Venezuela cu Arubianonan, esaki a bay bek bashi. E grupo grandi deteni no kier ta cera mas, pasobra nan tin lunanan eyden. Nan ta di opinion cu e condicionnan cu nan ta den dje no ta nada di gaba.