Diabierna mainta Corte a trata e caso contra e homber Venezolano Enzo Pirona, acusa di a drenta Aruba cu 4 handgranaat. Acusacion di cual el a wordo declara liber. E hecho aki a tuma luga dia prome di mei ultimo ora cu dos boto a yega Aruba pa baha un grupo di Venezolano den forma ilegal.
Enzo tabata abordo di un di e botonan aki cu a drenta costa panort di Aruba. For di prome dia e homber aki a nenga di a drenta Aruba cu e armanan ey. Segun su declaracion, e unico cos cu e tabatin den su poder ta su tas blauw cu algun paña. E dia ey un total di 6 persona a wordo deteni, 4 den oranan di anochi pa madruga y dos den oranan di dia.
E rapport traha door di un di e Polisnan ta bisa cu el a mira un homber flanel cora ta core. El a grit’e “para, para”. Pero e homber a sigui core. El a mira e homber cu flanel cora a saca un saco preto for di su tas y a tire afo. “No. Ami no a bini cu handgranaat. Mi a bini aki cu solamente paña. Ta prome biaha mi ta bini aki y mi a hacie door di e situacion na Venezuela.
Mi kier a traha un poco pa gana placa y manda Venezuela,” el a bisa Hues. El a reconoce cu su tas ta color pero cu ta paña so e tabatin den dje. Fiscal ta bisa cu ta imposibel cu por a Polis por a confundi. Tabata di dia cla y e tabata e unico cu flanel cora bisti. Y e Polis a mire saca e saco y tire afo. P’esey el a pidi un castigo di 18 luna incondicional. Abogado van der Biezen a bisa pa tene cuenta cu su cliente a nenga for di prome instante, un Polis so ta bisa esey y ta imposibel cu su cliente por tabata coriendo, y haci uzo di su dos mannan pa habri e tas y saca e saco pa tire afo. El a mustra potret tambe unda por mira cu despues e tas di su cliente tabata sin pañanan di dje y cu e handgranaatnan poni den e tas y no den un saco preto. Hues a cera tratamento di e caso y a tuma decision mesora.
Pa cuminsa el a bisa cu e pruebanan ta suficiente, tin e handgranaat cu a wordo haya. Pero a recorda cu no solamente mester tin e prueba pero Corte mester ta convinci tambe cu e persona en cuestion a comete e delito. Den e caso aki Corte no a keda convenci. E no ta compronde cu tanto polis na e sitio, y ta solamente uno a mira e acusado saca e saco y tira afo. Ta un palabra contra e otro. Pues a dicidi di declare liber di e acusacion pero a pone ordo pa deporte.
