Ilbert Maduro condena na 14 aña di prizon pa asesinato na San Nicolas

37

Corte di Prome Instancia a dicta sentencia awe mainta den e caso penal cu Ministerio Publico a cuminsa contra e sospechoso Ilbert Maduro. Ta acus’e di asesinato di Harmond Girigorie dia 16 di october 2018 banda di Julio’s Bar na San Nicolas. Fiscal a pidi Hues pa castiga e homber cu 14 aña di prizon y awe e Magistrado a confirma e demanda di Ministerio Publico. Famia di e victima a yega laat y no a scucha e sentencia ora Hues a dict’e den sala di Corte.

Abogado Chris Lejuez, cu a defende e sospechoso den Corte, durante tratamento di e caso algun siman pasa a apela riba defensa propio, ya cu su cliente a sinti miedo ora cu Harmond Girigorie a bin riba dje. El a kere cu Girigorie tabata arma, pero a rechasa e ponencia aki. No tabatin prueba ni indicacion cu e victima tabatin un arma cun’e.

E victima y e acusado tabatin un problema personal cu otro. E ex di e victima a bira pareha di Maduro. Y e hecho cu Girigorie continuamente tabata pasa dilanti nan cas ta tira palabra a pone cu Maduro su “fuse” a bula riba e fecha en cuestion.

Ilbert Maduro condena na 14 aña di prizon pa asesinato na San Nicolas

Ilbert Maduro condena na 14 aña di prizon pa asesinato na San Nicolas. Click link pa mas https://24ora.tv/2WTHWNu

Posted by 24ora on Friday, June 7, 2019

Hues a declara Maduro liber di e acusacion primario di asesinato premedita, pero si a hay’e culpabel di asesinato di Girigorie intencionalmente. El a haya chens di hala atras pero a sigui tras di su victima te ora el a haya e ultimo bala den cabes, a cay na suela y fayece na e sitio. Aunke Corte a tene na consideracion cu ta prome biaha e ta haya su mes envolvi cu un delito asina, a impone e mesun castigo di 14 aña pidi door di Fiscal.

Famia di e victima a yega ora cu e sentencia a cay caba y despues a bandona e sitio sin duna comentario Por a mira principalmente riba cara di e tata un tristesa hopi grandi. Harmond Girigorie tabata un bon amigo y tabata traha na Ministerio di Minister Chris Romero.