Aunke cu Polis a bisa ayera na un prome instante e detencion di Igor Kock tabata debi cu e tabata stroba trabou di Polis, awe nos a haya confirmacion cu e detencion ta debi na sospecho cu e ruman homber aki lo por sa mas di e candela cu consecuencia fatal di su mesun ruman. Nos ta referi na e candela fatal cu a tuma luga ayera tardi na e cas situa na Papilon 61-A na Santa Cruz. Ey e hoben Rigoberto Kock di apenas 32 aña di edad, a fayece.
Informacion adicional ta bisa cu precisamente ayera mainta e ruman Igor a sali for di Respaldo (Ex PAAZ), unda e ta ricibi tratamento mental specialisa. Ambos ruman homber tin problema cu adiccion y di cual Igor sigur ta ricibi tratamento regular. Pues el a sali mainta for di e centro y ya merdia e cas a pega na candela. Nan dos so tabata na cas na momento di e candela fatal. Tin testigonan ta sigura cu den pasado Igor lo a yega di menciona cu e lo mata su ruman Rigoberto.
E investigacion di Recherche awor lo mester aclaria varios scenario cu tin riba mesa. Un di nan ta cu a haya e victima na un distancia di mas o menos 8 meter leu for di e candela. Pues demasiado leu pa por a kima den e candela. Ey por pensa cu sea a mat’e prome cu e candela of a move e curpa despues di e candela y despues cu el a fayece na e sitio. Pasobra un persona di e edad hoben aki, esta 32 aña, mester por a core sali y salba su mes di un candela.
Mirando e comportacion di e ruman Igor na e sitio, cu coneu den man, teniendo su cacho na man, a duna un señal di tabata hopi frieu, casi por bisa cu e ta caracteristicanan di un pashent “schizophrenia”. Den pasado Aruba a yega di conoce mesun tipo di caso asina, tambe den famia, di cual cu sanger frieu a mata henter un famia. Despues e acusado no a ni corda mes kico el a haci. Te dia di awe no por cer’e y e ta den KIA, trahando y bebiendo su remedinan pa controla su enfermedad.
