Iglesianan: No vota pa parlamentarionan cu a aproba union civil

Recientemente Parlamento a aproba union civil cu 17 voto na fabor y 4 contra. Mas cu dos di tres parti di nos Parlamento tabata di acuerdo cu union civil. E pregunta ta si mas cu dos di tres parti di nos pueblo, representa door di Parlamento ta di acuerdo cu union civil.

Parlamentarionan actual hunto a acumula un total di 19.434 voto, esaki ta 33% di e votonan emiti durante ultimo eleccion. Parlamento a dicidi riba un tema asina crucial basa riba solamente un representacion di un di tres parti di esunnan cu a vota biaha pasa.

E parlamentarionan cu a vota na fabor di union civil tin un total di 17.421 voto. Esaki ta solamente 24.6% di tur esunnan cu tabatin derecho di voto na 2017 of 29.7% di e votonan valido na 2017. Pa e motibo aki Iglesianan Cristian tabata boga pa un sondeo serio tuma luga tocante opinion di pueblo riba un asunto asina serio manera union civil.

Iglesianan Cristian di Aruba ta expresa palabra di elogio na e cuater parlamentarionan cu a vota contra pasobra nan ta convenci cu un materia di e seriedad aki ta rekeri un consulta directo cu pueblo. Loke ta sobra pueblo awor ta den e siguiente eleccion expresa su aprobacion of desaprobacion di e manera con e Parlamentario cu ta represent’e a vota dia 1 di maart 2021. Kisas e persona cu bo a vota p’e na 2017 no a drenta parlamento, pero bo voto si a pone cu un persona a drenta parlamento cu kisas si a vota na fabor di union civil.

Comision di Pastornan den representacion di Iglesianan Cristian di Aruba ta sigui pidi Dios duna nos gobernantenan y nos representantenan den parlamento e sabiduria necesario pa sigui guia nos pais den bon caminda.