Gobierno a scucha inkietud di Iglesia Cristian Aruba (ICA) y a sigura nan cu ta investigando loke a pasa. A colecta mas di 14400 firma, pero e meta ta pa yega 30 mil. Tin un deadline pa cassatie cu ta dia 6 di maart proximo.
Frank Daal a expresa cu nan a haya voto di 14420 hende y esey ta un señal cu nan no kier p’e ley di matrimonio di mesun sexo pasa. E ley aki ta e porta pa e otro leynan bin su tras. E ta enfatisa cu Aruba tin moral, Aruba stima Dios, Aruba ta cristian y kier tene matrimonio, famia den su forma original, manera Dios a cre’e. Tambe Aruba no kier pa ningun hende mete cu nan yiunan.
Aunke cu nan no a manda carta pa prome minister, e ta gradici cu e mandatario a traha tempo pa asina nan por a papia. Segun Daal, pa loke tabata e barco di diaranson, esey ta un preocupacion grandi no pa nan pero pa Aruba. Di a mira tur cos poni riba media social, e tabata completamente inaceptabel loke a tuma luga den centro di ciudad na e luganan publico.
Esaki ta algo cu no por ripiti mas. E ta haya cu si nan no lanta y haci algo, nan lo sigui bin y tur letter cu ta bin patras dje ‘L’ y ‘+’ ta bay pensa cu aki na Aruba nan por haci loke nan kier. Como isla turistico nan ta bonbini, pero ta recorda e turistanan LGBTQ comporta nan mes.
El a sigui indica cu prome minister a bisa nan di tabata sorpresa di mira tur loke a pasa, pero manera nan, e mandatario tambe a haya tur video. “El a bisa nos cu e ta investigando”, Daal a expresa. Ta investigando pa mira kico a bay robes y dicon no a actua, dicon no a haci conforme ley. Iglesia Cristian Aruba ta contento cu e contesta ricibi di prome minister.
Segun e pastoor, e mesun barco cu a yega Aruba diaranson, tambe a bay Corsou. Pero na Corsou nan no a haci e mesun bomboshi haci aki. E ta haya cu si nan por a comporta na Corsou, nan por a comporta aki tambe.
CASSATIE
E firmanan cu nan a colecta ta mustra cu Aruba kier bay cassatie. Corsou a bay cassatie y no a warda mes. Daal ta kere cu e firmanan ta suficiente pa bisa cu Aruba kier bay cassatie y para e ley. E ley no ta aceptabel y e ta uno peligroso. E ta peligroso pasobra cu asina e porta cu ta habri pa tur otro cos cu bin y no por discrimina nan pa motibo di ley.
INACEPTABEL
Peter Hazenoot, dominee di Predikant Protestantse Gemeente, a indica cu loke a pasa diaranson no ta bon. El a papia cu hende di negoshi, cu no ta forma parti dje iglesia, y nan mes no tabata di acuerdo cu loke a pasa. No ta e pastoornan ni e creyentenan, pero incluso gay di comunidad cu a vocifera cu esey ta algo inaceptabel.
E barco aki a bay, pero mester corda cu ta bin un otro barco, un otro avion. Ta bin un otro iniciativa nobo cu e pensamento di unda por saca placa. Nan ta pensa cu aki por influencia y esaki ta leuk pa Aruba.
Dominee Hazenoot a indica cu tur hende por a mira con nan a gara hende di sorpresa, pero awo mester ta mas atento. Bijbel mes ta bisa cu Hesus a bisa “Esun cu tin berguensa di Mi, Mi lo tin berguensa di dje, pero esun cu bin dilanti Mi, Mi lo sali p’e (wie zich voor mij zal schamen, voor hem zal ik me schamen, maar wie voor mij uitgekomen zijn, voor hen zal ik uit komen).”
Pa mas lesa TREMPAN.
