Ya caba IBiSA ta preparando pa e di 24 Betico Memorial Run 2020. Esaki ta un di e prome caredanan di aña y e biaha aki lo bay tin un special, pasobra ta bay haci’e manera un antesala pa e di 25 careda. Ta bay tin cupo pa mas di 1125 persona. Awo cu ta tempran, registra pa bo ta parti di e careda aki. Ya caba awe, dia 21 di november por registra online riba nan website.
E pago por haci’e na IBisa mes na Playa y IBiSA San Nicolas. E careda lo tuma luga dia 25 di januari 2020. E careda ta cuminsa pa 6’or di mainta y ta cuminsa na Centro Deportivo Betico Croes.
E prijs pa registracion pa local ta 25 florin y pa esnan di afo ta $20. Tin un early bird special, cu si paga prome cu 13 di december, bo por haya bo nomber riba bo Bib. E aña aki lo bay bin cu un categoria nobo, cual ta den e 10 kilometer, bo por participa cu cuater persona. Tur cuater persona ta core tur 10 kilometer, pero na final ta tuma tempo y ta acumula nan hunto. E ora bo ta cay den categoria di team y asina tin chens pa gana e prome, di dos of di tres luga.
A remarca cu si scoge pa participa den e team, bo ta saca bo mes afo di e parti di individual. Bo no ta cay den premio di overall individual di 10 kilometer.
E otro categorianan cu tin ta manera tur aña ta 6 kilometer y tin 10 kilometer. Tin overall winners di tur y tin prome, di dos y di tres den e categorianan di edad for di U-20 te cu 60+.
Loke cu e participantenan lo ricibi ta un dryfit shirt, e bibnumber cu su chip y un finishers medal. Dimes e ganadonan lo haya nan medaya tambe.
Ta recorda tur hende y pueblo di Aruba, pa ta na tempo pa bo no keda for di careda, registra. Si bo registra, no ta nifica cu bo ta participa automaticamente. Corda paga pa bo ta parti di e careda aki. E biaha’ki e lo ta algo special y lo haci un cantidad special.
Bin disfruta y participa den e Betico Memorial Run. Semper por busca mas informacion por tuma contacto cu Ibisa, of subi riba nan pagina di facebook of tambe Instagram.
