Diaranson a keda publica riba un website di noticia di un caso di violacion di un alumno di Ibero American High School. Y e scol no ta tolera ningun forma di inmoralidad, cualkier forma di inhusticia, cualkier forma di descriminacion, segun director di e scol, William Senteno, sperando cu despues di e conferencia di prensa diahuebs mainta na e scol, por reenforsa e confiansa cu mayornan tabata tin caba den e scol.
Pero prome cu esey, e director, den compania di Tico Monte, Office manager di e scol y tambe e directora interino, sra. Senteno, a trece nan punto di bista riba e publicacion cu a sali diaranson.Director Senteno a menciona cu e articulo tabata hopi sensacionalista. Pero den opinion di e director, no a menciona e hechonan corectamente.
Ibero American Highschool : reacion riba caso di abuso sexual
Posted by 24ora on Thursday, May 23, 2019
Senteno a splica cu el a prefera, como director di e scol, pa un articulo asina, si e periodista lo a tuma contacto cu e scol, pa asina haya e otro banda di medaya. Den periodismo, tur situacion tin dos banda.Senteno ta lamenta cu esey no a pasa. No ta cu Ibero American High School, ta un scol tipico pa wak riba dje. No ta cu nan ta ubica na un otro pais na mundo. Tur hende sa unda Ibero American High School ta.Si esey a tuma luga, e no lo a yama e conferencia di prensa. Bao di e circunstancianan actual, ta deal cu un menor, kende a wordo victimalisa caba, prensa mester ta cuidadoso pa no re-victimalisa e victima y haci e situacion mil biaha mas pio. Mester tene cuenta cu e victima, segun Senteno.
E victima a papia cu e director y a bis’e cu nunca el a sinti asina den su bida y cu e ta sinti su mes malo y no por bay bek scol.Si esaki a wordo haci na un miho manera, e victima lo a sinti su mes empodera y cu forsa y defendi. Senteno ta spera cu proximo biaha cosnan por wordo haci na un otro manera teniendo cuenta cu e victima.
Berdad di e hechonan
E situacion aki a bin na su atencion mas of menos dos luna pasa. Durante e tempo eynan, a pidi pa scol conduci su propio investigacion. Directora interino di e scol, sra. Senteno, a haci e investigacion. E director a menciona cu si e sospechoso ta culpabel, e lo wordo kita for di su trabao.Algun siman despues e directora interino a bin y basa riba loke e sospechoso a bisa y e victima a bisa, e comunicacion no tabata etico, inmoral y fuera di e standard di e scol.
Director Senteno a yama e sospechoso tres siman pasa y a haci loke el a bisa. El a kit’e for di trabao.Actualmente e no ta miembro mas di e staff. E no ta traha mas na Ibero. Esey a tuma luga tres siman pasa.
Tambe director Senteno a splica cu e sospechoso no tabata un docente na e scol, sino e IT Manager. Nunca un docente. Senteno kier a haci e coreccionnan aki.E sospechoso no a bishita e scol desde cu el a wordo kita. Ibero American High School ta sirbiendo e comunidad pa mas di 15 aña. Pa loke ta principio y moral, tin algun scol cu por para banda di Ibero. Ibero tin moralnan halto. E scol ta funda riba principionan cu ta indiscutibel, segun e director.Ta demanda moralnan halto for di e studiantenan y ta exigi esakinan tambe di e docentenan.
Directo Senteno a agrega bon cla cu e scol no ta tolera ningun forma di imoralidad for di studiante, tampoco di e staff. Nan standardnan di moral y etico ta hopi halto y nan ta indiscutibel y nan tin un historia cu por para tras di esaki. Ibero American High School ta lamenta profundamente loke a pasa y kier a haci un disculpa publico na tur esnan envolvi y ta spera cu e confiansa cu e mayornan y comunidad tabata tin den e scol den pasado, cu e confiansa ey por wordo reenforsa despues di e conferencia di prensa convoca diahuebs mainta.
