Skirbi pa Clyde Harms
Shete aña pasa mi a expresa mi opinion cu e articulo aki. Dos persona den Ministerio di Turismo a comenta n’ami cu e Minister di Turismo a haci e declaracion cu ta NAN mester a skirbi’e pero “no tabata posibel”. Cu su ultimo decision Min. Otmar Oduber a haci lo ke e mester a haci 7 aña pasa, pero no tabatin e curashi politico. Mi opinion di e Logo no a cambia. Al contrario! Despues cu a bira obvio cu e Logo lo a bira un plataforma di publicidad pa e productonan cu e doño ta bende, mi a opone e situacion mas ainda. Pero mi ta admira e rumannan Lejuez pa nan persipicacia comercial.
Mi no ta duda cu miyones di turista a saca potret di e Logo y plama nan den henter mundo, pero e mes turistanan lo a haci mescos cu e Logo di ATA, un logo original. Awor ami lo kier sa si Gobierno a yega di haya un cen pa e uzo comercial di e tereno di pueblo.
2012. Ultimamente mi por a lesa hopi di “branding” di Aruba den corantnan local. Un diccionario di Ingles cu ami ta uza ta bisa: (branding) the promotion of a particular product or company by means of advertising and distinctive design. Traduci libremente na Papiamento: E promocion di un producto of compania uzando propaganda y un diseño distintivo. Pa mi, e palabra clave aki ta distintivo. E meta di “branding” di Aruba mester ta pa distingui Aruba, pa diferencia nos pais di tur otro destino turistico, pa duna e isla un toke excepcional. E logo cu a wordo introduci aña pasa ta manera un brisa fresco cu berdaderamente ta representa Aruba como One Happy Island. Un diseño colorido, alegre, original y lo mas importante, distintivo.
Pero kico ta pasando awor? Dilanti di Bestuurskantoor, caminda nos por mustra henter mundo cu nos ta diferente y excepcional, nos tin un otro logo enorme, grandura di un wagon di trein, cu ta uza un rebus pa bisa I Love Aruba. Pa turistanan di cruseronan e ta masha conveniente pa saca potret y tin bes por mira nan para na fila pa nan chens pa saca nan potret dilanti di e curason. Pero hopi turista cu ta keda na e hotelnan tambe ta saca potret dilanti di e logo ora nan bin Playa pa shop of djies keiru. Mi ta imagina mi cu e potretnan aki ta yega tur parti di mundo.
E logo I Love Aruba ta obviamente un imitacion di e famoso I LOVE NY logo, e logo mas imita den historia, segun New York Times. Segun e mes rotativo, e logo a bira un molde pa declaracion di amor pa un multitud di hende, lugar y cos. Por ehempel, I Love Yankees, I Love Jesus, I love Romney, I Love Obama, I Love Denmark, etc., ad nauseam. Por agrega cu esaki ta sosode den tur idioma. E logo a wordo usa gratuitamente pa dies aña prome cu e estado di New York a obtene un copyright pe. Te hasta Andy Rooney q.e.p.d., e defunto ex-presentado di e famoso programa “60 Minutes” di CBS, a haci bofon di e uzo excesivo di e logo aki. Usando e logo aki, Aruba ta bira uno mas di e miles di “copy cat”, un copiado di idea, un imitado di otro. Nada original. Nada excepcional.
Sin duda algun, e I Love NY logo ta impresionante, sino e lo no a wordo copia asina tanto tur parti di mundo. Ami ta desea e promotornan local di e logo aki hopi benta. Pero pa Aruba su meta di “branding” como un destinacion turistico excepcional, e uzo di un copia di un logo mas di cuarenta aña bieu no tin sentido. Te hasta e doño di e logo, New York State, a pon’e un banda pa su campaña di propaganda turistico mas recien!
Si nos kier imita, laga nos imita Gobernador Cuomo di New York. Lago nos pone e logo I Love Aruba un banda y concentra riba e logo nobo. Pa cuminsa, laga nos reemplasa e logo dilanti Bestuurskantoor, un imitacion, cu esun di ARUBA One Happy Island, un original genuino.
