Esunnan cu a pasa den fin di siman cerca di e hotel bou construccion dilanti Aeropuerto Internacional Reina Beatrix lo por a mira cu nan a hisa e borchi indicando nomber di e propiedad. Esaki ta un paso grandi den e trayecto di construccion di e propiedad, cu awor ta planea pa habri na luna di september proximo. Aunke cu ta mustra di tin basta trabou ainda pa realisa, toch por mira cu ultimo lunanan e trabounan a avansa den forma rapido y notabel pa tur cu ta pasa su dilanti por mira.

Tabata na luna di februari 2017 cu Hyatt Hotels Corporation a anuncia cu nan a cera un “management agreement” cu Pelca Development VBA pa opera un Hyatt Place Hotel den e Aruba Airport Business Center na Oranjestad. E hotel di 116 camber lo ta e prome Hyatt Place Hotel na Aruba, net banda di Aeropuerto Internacional Reina Beatrix y lo brinda huespednan un luga relahante y facil pa tuma un pausa prome cu cuminsa cu e proximo parti di nan biahe.

E marca Hyatt Place ta ancra den un percepcion di consumidor amplio cu ta indica cu e huespednan ta busca experiencianan elegante, comodo y sin interupcion cu por adapta na nan estilo di bida y rutinanan familiar na dje. Pa logra esaki, e marca ta ofrece hospitalidad informal y un servicio sin igual hunto den un diseño contemporaneo.

Hyatt Place Aruba Airport lo ta situa riba un tereno di aproximadamente 2.1 hectaria di uzo mixto cu lo contene 21 mil pia cuadra di espacio comercial, como tambe un food court y facilidadnan di compras, restaurant y huurmento di auto di 8 mil pia cuadra. Adicionalmente, e hotel ta ilustra un walkway cubri cu ta provee e peaton un acceso directo entre e hotel y aeropuerto, cu actualmente ta sirbi mas di dos miyon di pasahero pa aña via di mas cu 20 aerolinea internacional.

E trabounan ta laat den e schedule cu Hyatt mes a anuncia, pasobra a planea pa cuminsa construccion na principio di 2017 ya proyecta pa habri na final di 2018 pa asina uni na Hyatt Regency Aruba Resort Spa y Casino. Pero awor aki ta papia di habri na september proximo. E hotel aki ta marca e di cuater Hyatt Place den Caribe, hunto cu Hyatt Place Manati, Hyatt Place San Juan/Bayamon y Hyatt Place San Juan/City Center na Puerto Rico.

Na luna di april ultimo a bira conoci cu Marta Raven a bira General Manager di e hotel nobo. Riba e foto e ta hunto cu dirigentenan di AHATA cu a haya un tour dor di e facilidad nobo y moderno di Hyatt Place Aruba Airport.

Tocante Hyatt Place

Ta bon pa menciona cu tin mas di 260 hotel bou di e marca Hyatt Place na mundo, parti den Merca, Armenia, Brazil, Chile, China, Costa Rica, Honduras, India, Mexico, Morocco, Nicaragua, Panama, Puerto Rico, Thailand, Hulanda, United Arab Emirates y Inglatera.

Tocante Hyatt Corporation

Hyatt Hotels Corporation tin su oficina principal na Chicago y ta maneha no menos di 12 marca renombra na mundo, den 679 diferente propiedad den 54 pais parti den 6 continente. Hunto cu su companianan subsidiario, nan ta desaroya, maneha, opera, duna frankicia y licensia pa hotel of residencianan pa vakantie of negoshi bou di e nombernan Park Hyatt®, Grand Hyatt®, Hyatt Regency®, Hyatt®, Andaz®, Hyatt Centric®, The Unbound Collection by Hyatt™, Hyatt Place®, Hyatt House®, Hyatt Ziva™, Hyatt Zilara™ y Hyatt Residence Club®.

Comments

comments