Awe tardi Minister Dangui Oduber a haci un “site visit” na Hyatt Place Airport Aruba, e hotel cu tabata programa pa habri fin di aña pasa pero cu ta coriendo casi 1 aña atrasa. A cuminsa acepta reservacion desde 1 di november mientras cu desde 16 di october lo cuminsa training intensivo di e empleadonan riba con pa duna servicio di calidad na tur huesped.
Minister Dangui Oduber a gradici e gerente general, esta Martha Raven di Aruba y e inversionista, famia Cano di Venezuela, pa a kere den economia di Aruba y a desea nan hopi exito. A inverti 50 miyon dollar Mericano pa construccion di e edificio aki.
A start construccion 2 aña pasa
Tabata na luna di februari 2017 cu Hyatt Hotels Corporation a anuncia cu nan a cera un “management agreement” cu Pelca Development VBA pa opera un Hyatt Place Hotel den e Aruba Airport Business Center na Oranjestad. E hotel di 116 camber lo ta e prome Hyatt Place Hotel na Aruba, net banda di Aeropuerto Internacional Reina Beatrix y lo brinda huespednan un luga relahante y facil pa tuma un pausa prome cu cuminsa cu e proximo parti di nan biahe.
Hyatt Place Aruba Airport ta situa riba un tereno di aproximadamente 2.1 hectaria di uzo mixto cu lo contene 21 mil pia cuadra di espacio comercial, como tambe un food court y facilidadnan di compras, restaurant y huurmento di auto di 8 mil pia cuadra. Adicionalmente, e hotel ta ilustra un walkway cubri cu ta provee e peaton un acceso directo entre e hotel y aeropuerto, cu actualmente ta sirbi mas di dos miyon di pasahero pa aña via di mas cu 20 aerolinea internacional.
E proyecto ta atrasa den schedule
E trabounan ta laat den e schedule cu Hyatt mes a anuncia, pasobra a planea pa cuminsa construccion na principio di 2017 y a proyecta pa habri na final di 2018 pa asina uni na Hyatt Regency Aruba Resort Spa y Casino. Pero awor aki ta papia di habri na november proximo. E hotel aki ta marca e di cuater Hyatt Place den Caribe, hunto cu Hyatt Place Manati, Hyatt Place San Juan/Bayamon y Hyatt Place San Juan/City Center na Puerto Rico.
Tocante Hyatt Place
Ta bon pa menciona cu tin mas di 260 hotel bou di e marca Hyatt Place na mundo, parti den Merca, Armenia, Brazil, Chile, China, Costa Rica, Honduras, India, Mexico, Morocco, Nicaragua, Panama, Puerto Rico, Thailand, Hulanda, United Arab Emirates y Inglatera.
Tocante Hyatt Corporation
Hyatt Hotels Corporation tin su oficina principal na Chicago y ta maneha no menos di 12 marca renombra na mundo, den 679 diferente propiedad den 54 pais parti den 6 continente. Hunto cu su companianan subsidiario, nan ta desaroya, maneha, opera, duna frankicia y licensia pa hotel of residencianan pa vakantie of negoshi bou di e nombernan Park Hyatt®, Grand Hyatt®, Hyatt Regency®, Hyatt®, Andaz®, Hyatt Centric®, The Unbound Collection by Hyatt™, Hyatt Place®, Hyatt House®, Hyatt Ziva™, Hyatt Zilara™ y Hyatt Residence Club®.
