Ministerio Publico di Aruba a uza e sentencia di Corte Comun di Caribe Hulandes, contra ex Prome Minister Gerrit Schotte di Corsou, como un base, esta como un ehempel den e caso di ex Minister Paul Croes na Aruba. Den e caso di Schotte a conden’e na tres aña di prizon y cu durante 5 aña e no por participa den eleccionnan politico na Corsou. Fiscal a cuminsa anuncia cu den caso di ex Minister Paul Croes, e lo pidi mas castigo!
E motibo dicon kier castiga Croes di Aruba mas cu Schotte di Corsou, ta pasobra, na opinion di Ministerio Publico, cu e practicanan ilegal cometi dor di ex Minister Paul Croes a dura mas largo, tin hopi mas caso di cual ta sospech’e di dje y cu e decisionnan di ex Minister Croes tabatin un impacto hopi mas grandi pa nos pais y nos comunidad.
Dor cu ex Minister Paul Croes, den forma delibera y consistente, tabata otorga permiso pa stranheronan por participa den nos mercado laboral, tambe den casonan unda cu de facto nan no ta bin na remarca pa un permiso, a haci cu innecesariamente a permiti hopi stranhero pa bin traha na Aruba, lagando nos propio Arubianonan sin trabou. Tambe ta acus’e cu dor di su hechonan, cu hopi hende na Aruba a cuminsa pensa cu ta normal cu un Minister ta pidi fabor of placa pa haci su trabou.
Pa loke ta e medidanan adicional na e castigo cu Ministerio Publico lo pidi dialuna, e Fiscal a cuminsa bisa cu a tene cuenta cu den e sentencia penal contra ex Minister Presidente Gerrit Schotte na Corsou, cu e tabata un comerciante prome cu el a asumi su funcion politico y di mandatario. Sinembargo, Paul Croes tabata un empleado publico na Departamento di Relacionnan Exterior, y como tal tin derecho pa regresa den su puesto bieu, awor cu e no ta Minister ni Parlamentario mas. Pero segun e Fiscal di Ministerio Publico, Paul Croes ta descualifica totalmente como un “ambtenaar”. E Fiscal ta bisa cu “Miho lo ta pa nunca mas e no ocupa un funcion asina, ni como politico y pio como empleado publico. Pero esey ley no ta permiti”. Teniendo e realidad ey na mente, Husticia a bisa di awe caba cu dialuna awor nan lo scoge pa pidi e castigo maximo permiti pa ley pa prohibi Paul Croes di participa den cualkier eleccion politico y cu e no por ocupa un puesto den e aparato gubernamental mas.
Mester menciona cu den ambos caso, e opcion maximo ta 5 aña (Articulo # 1:64-65-66 di nos Codigo Penal), pues tanto pa no participa den eleccion Parlamentario como politico y pa ta for di e aparato gubernamental.