Ministerio Publico a cera e investigacion di e incidente cu a tuma lugar riba 3 di juni 2017 na Boegoeroei, den cual un agente policial Tino Ruiz y e ciudadano Ericho Jimmy Tjong Kon Sang a fayece. E incidente mortal a wordo investiga dor di Landsrecherche. Fiscal di husticia a pone e famia di e fayecidonan na altura di e conclusionnan di e investigacion. Ademas Fiscal di husticia a informa e sospechoso tocante e decision tuma.

E dia en cuestion dos Polis a reacciona riba un melding di un persona mental lantando cu famia den cas. Ora a yega na e sitio, e persona a ataca un di e agentenan policial y el a fayece. Su colega a hay’e obliga pa tira cu su arma di servicio riba e persona, kende tambe a fayece.

Fiscal di husticia a yega na conclusion cu e polis a haci uzo legitimo di su arma di servicio. El a actua den defensa propio. E agente policial lo no wordo persigui y Ministerio Publico lo suspende e caso contra dje.

Normalmente e persona cu a ataca y a tuma bida di e agente policial, lo a wordo persigui pa husticia. Sinembargo, como cu e tambe a fayece, esey no ta posibel.

Altocomisario di Polis a wordo poni na altura di e decision tuma pa Fiscal di husticia.

Ta bon pa bisa cu Litmar Lacle te dia di awe a keda traumatisa pa e susedido. Durante e investigacion, cu a bini riba insistencia di famia di ambos fayecido, a saca afor cu e Polis hoben a actua corecto y dentro di ley. Ta spera cu awor cu tin mas claridad, cu por bin final y aceptacion tambe riba locual a sosode aña pasa. Ta pa prome biaha den historia di Aruba, cu un Polis ta perde su bida “na pia di trabou”.

Comments

comments