Jairo Chalgut den un acto di sorpresa diamars merdia a admiti dilanti Huesnan di Hof cu el a mata e mucha muhe Sarahi Sierra di 19 aña riba 3 di november, 2017.
E caso aki cu a hiba e nomber di De Vuyst, a causa shock den comunidad pa e forma cruel con e mama y studiante hoben aki a wordo mata. Tabata su ruman chikito di 13 aña a bin haya e cas reboltea, su ruman mita sunu, cu mannan mara na su pia y saco di plastic riba su cabes, y sin bida. Despues a constata cu e hoben a wordo viola tambe.
Den prome instancia Chalgut a nenga categoricamente di tin algo di haber cu e asesinato cruel aki, cu e no tabata na e sitio mes dia y momento di e sucedido, sino te na Tarabana y hasta a busca testigo pa confirma su declaracion.
Como cu no a prueba cu el a comete e acto basa riba un plan cu el a traha, cu lo a mustra cu el a actua premeditamente, Corte a hay’e culpabel di violacion sexual y di a kita bida di e hoben. Ministerio Publico a pidi un castigo di bida largo mientras cu Corte dia 28 di september ultimo a conden’e na 20 aña di prizon.
Ministerio Publico no tabata di acuerdo cu e decision aki y a apela e decision y e caso a wordo trata diamars.
E acusado cu a presenta diamars den Corte tabata mustra bruha. E kier papia y despues no kier contesta pregunta mas. Te cu dado momento Hues a mand’e consulta cu su Abogado pa mira si e ta contesta preguntanan. Y nan a wordo sorprendi pasobra ora cu el a drenta bek, di biaha el a bisa “Mi a mat’e”. Pero mas pregunta e no por a contesta pasobra e no ta corda con cos a sosode. E sa cu nan tabatin un discusion y cu e tabata basta droga door di uzo di cocaina.
Tambe el a declara cu pa dos aña caba e tabatin un relacion intimo cu e victima. Pakico ta te awor el a bin declara esaki, e no por a duna un splicacion.
Ya cu esaki y tur e pruebanan PG a dicidi di exigi un castigo di 28 aña di prizon. Otro luna lo tin sentencia den e caso aki.
