Diabierna anochi MetaCorp a celebra cu algun hubilario durante un evento cu a tuma luga na Balashi Beer Garden. A celebra cu Miguel Guzman, Andronico Rasmijn y Zulayma Ridderstap-Croes, hunto tin por lo menos ochenta aña dedica na MetaCorp y subsidiarionan. E tipo di empleadonan dedica asina y cu ta presenta tur dia cu un dinamismo grandi pa hiba nan mes y e compania padilanti, awendia ta masha scars.
Miguel Guzman
Miguel Guzman a cuminsa traha cu ATCO Aruba na aña 1992 como contratista. E aña ey ATCO a cumpra cantidad di makinaria di un compania “Sicel”. E tempo ey, Miguel tabata traha pa Sicel como operator y e tempo ey, ATCO tabatin mester di operator pa e ekiponan cu nan a cumpra.
Sabiendo cu Miguel tabata traha cu Sicel, a acerc’e pa puntr’e si e ta interesa pa traha pa ATCO. Un aña despues, dia prome di februari 1993, Miguel a drenta den servicio permanente di ATCO reportando na Pablo Peasch, kende e tempo ey tabata operations manager. Miguel a cuminsa cu e funcion di driver operator y den poco tempo Miguel por a domina practicamente tur ekipo.
Miguel a demostra su habilidad durante tempo y demostra cu e no tabatin miedo di haltura. Esey a haci cu Miguel a bira un persona clave den e operations department y tambe den e seccion di heavy lift. Algun aña despues, ATCO a sigui crece y e compania tabatin mester di supervisors. Wendell Bennet e tempo ey operations director di ATCO a recomenda Pablo Peasch pa puntra Miguel si e ta interesa den un supervisory position. Dia 20 di december 2007, a promove Miguel pa supervisor operations.
Asina e trayectoria di Miguel a cuminsa como supervisor na 2007 te cu e dia di awe. Miguel semper ta e prome yama pa mayoria di e “compania ruman” manera nan encontra un problema cu nan mester di un ayudo. Miguel semper a demostra di ta dispuesto pa asisti sin importa e orario. Miguel a demostra gran habilidad den trece proyecto aden y tambe thinking out side the box. No ta tur ora tur idea tabata resulta, pero trece un idea of un plan ta mescos cu cumpra Lotto pues “si bo no cumpra bo no por gana”.
Miguel ta hopi gusta y aprecia door di su coleganan, esey ta algo hopi positivo. Trinta aña di servicio ta un milestone cu hopi lo no por yega. Trinta aña ta nifica cu algo mester ta bon. Famia di ATCO y MetaCorp completo ta gradici Miguel y su famia pa e 30 añanan di servicio brinda na compania y ta spera cu por sigui conta cu su sosten pa hopi aña mas.
Andronico Rasmijn
Andronico tambe tin un historia largo den e famia di Meta Corp. Cariñosamente su coleganan ta yam’e Ito. Ito tabatin un ruman homber cu tabata traha cu Ecotech. E ruman homber ey a dicidi di bay imigra na Hulanda. E tempo ey, nan a puntra e ruman di Ito si e por conoce of recomenda un persona pa tuma su trabou. E tempo ey e ruman a recomenda Ito. Asina e storia di Ito a cuminsa, 25 aña pasa, cu e famia di ATCO. Ito ta un trahado cu ta traha all around. Ito tin un dicho cu e ta uza semper: “pone mi unda cu ta y mi ta traha”. Ito ta un persona cu no ta papia hopi y ta masha reserva. Ito tambe a yega di traha den e departamento di heavy lift caminda e ta traha cu e trahadonan jong y a demostra cu e por keep up cu nan sin ningun problema.
Si Ito reclama algo ta pasobra e ta mal haci, pasobra su coleganan sa cu Ito no ta un persona cu ta gusta reclama. Semper Ito ta un persona respetuoso cu ta leal y ta mantene su mes na tur regla di trabou. Ito semper ta un driver cu su productividad ta sobresali. Famia di ATCO y MetaCorp completo ta gradico Ito y su famia pa e 25 añanan di dedicacion brinda na compania.
Zulayma Ridderstap-Croes
Zulayma a cuminsa traha pa MetaCorp dia 26 di november 1997 den e departamento di accounting. El a inicia cu e compania Boulevard Casino y despues di 7 aña trahado pa e casino, dia prome di december 2004 el a cuminsa traha na e oficina principal di MetaCorp. Alabes el a traha pa demas subsidiario. P’un tempo el a traha pa MetaCorp Investment y tabata encarga cu e payroll pa den e tempo ey yama The Cinemas. Na juni 2016 a apunta Zulayma pa asisti Maduro Travel despues di benta di e hotel y casino. El a traha na Maduro Travel te cu 2020. Na aña 2021 Zulayma a cuminsa traha pa ATCO/ Ecotech. Mirando su carera pa MetaCorp, por bisa cu Zulayma ta conoci pa tur e funcionnan den e departamento di accounting y ta un persona capas di tuma cualkier reto cu pasa den su caminda. No ta importa unda MetaCorp tabatin mester di ayudo, semper Zulayma tabata cla pa duna un man. MetaCorp ta gradici Zulayma pa tur e añanan di dedicacion y ta desea pa e por ta hopi aña mas cu e compania.
