Awe diasabra Fundacion Pa Nos Muchanan hunto cu Stichting Hunga Teca a organisa un tayer pa mayor cu tin yiu entre 0 pa 12 aña. Tema di e tayer tabata “E importancia di hunga den desaroyo di bo yiu”. Varios mayor a participa activamente.
A cera nan conoci cu e wega y co’i hunga apto, segun e edad y segun e aspecto di desaroyo di un mucha. Por ehempel cua co’i hunga y cua wega ta bon pa hunga cu un mucha di entre 0-1, 2-3, 4-5, 6-9 y 10-12 aña di edad.
Tambe nan a siña tocante e beneficionan di hunga y haci wega, no solamente pa e mucha, sino tambe pa e mayor. E participantenan a experencia nan mes con dushi ta pa bira mucha atrobe y hunga cu cosnan cu ta facil pa traha y alabes a haya oportunidad pa ta creativo y traha un wega of coi hunga cu material recicla.
Mester observa cu e cooperacion entre Fundacion Pa Nos Muchanan cu Hunga Teca, ta un combinacion sublime. Participantenan tabata studiante di EPI Welzijn, lidernan na crêche, mama y madrina. E fundacion ta yama danki di curason na tur participante.
Hunga Teca ta manera un biblioteca, pero unda cu e muchanan por fia co’i hunga y weganan educativo. Gobernador di Aruba, Alfonso Boekhoudt a efectua e apertura oficial na YMCA na San Nicolas, na september 2019. E fundacion a ricibi aporte di muchanan di scol cu a regala nan co’i hunga nan.Directiva di Stichting Hunga Teca ta consisti di Yamila Hoevertsz-Kock como Presidente, RoseMarie de Vries-Shuffler como Tesorero, Cheryll Lim-Apo como Secretario y como miembro tin tambe Shurman Milliard y Victoria Danilova.
Mucha entre 0 pa 12 aña ta bon bini na Hunga Teca den e mesun edificio di YMCA na San Nicolas, basta cu nan ta compaña pa un adulto, riba diasabra for di 9:00 am pa 11:00 am. Door di medidanan adicional pa motibo di pandemia, orario pa pasa cera conoci y of pa bira miembro ta solamente cu afspraak via celular 5943334.
Pa mas informacion por subi e website www.hungateca.com. Riba e website nan tin nan number di cuenta di banco na Aruba Bank. Tur tiki ta yuda. E fundacion ta dispone di nan pagina riba Facebook y Instagram.