Huma di WEB un biaha mas ta causa cu trabao a bay plat na waf di Barcadera

4

Un biaha mas waf di Barcadera ta plat. Trahadornan di Astec no por traha den e area aki bahando container for di barco Ipanema, cu ta para riba un diamars den waf di Barcadera.

Bao di e kraan e barco ta para y trabaonan ta para pasobra cu e huma di WEB atrobe, ta un problema. Nan ta midi’e y a base di e midimento ta conclui cu nan no por traha. For di prome cu nan midi’e, e efectonan riba e salud di e trahadonan, a bira un molester di tal forma cu nan ta pone trabao abao. Ora bay haci midimento, ta confirma esaki tambe.

Semper esaki ta bira un problema pasobra e ta dura oranan largo, depende con e biento ta supla, prome cu cos normalisa y cu e trabaonan por cuminsa atrobe, bahando container for di barco.Barco a drenta for di mainta. Tur cos ta para cu e kraan. Kisas di container ta drenta sali, pero esun di e barco no por wordo baha y esey ta trece un problema hopi serio pa e trabaonan. E barco mester keda mas largo y hasta tin biaha, e ta bandona Aruba sin cu el a baha e containernan y ta bay Corsou.

Huma di WEB un biaha mas ta causa cu trabao a bay plat na waf di Barcadera

Huma di WEB un biaha mas ta causa cu trabao a bay plat na waf di Barcadera

Posted by 24ora on Tuesday, April 30, 2019

Mañan ta un dia liber. Ta dia di obrero, y no sa si lo bay sigui e trabaonan riba tereno di waf. Of mester paga overtime, manera ta pasando ultimamente. Overtime na cantidad, den oranan laat, despues di trabao, pa por caba di cumpli cu e trabaonan di containernan cu tin cu wordo baha y despues otronan bashi cu tin cu wordo poni riba e barco pa e sigui su ruta pa Corsou, por ehempel.Un hende mester carga e gastonan aki. Ya a tende y a publica algun dia pasa, cu gastonan ta bay subi, of a subi caba, pa e maneho via empresanan cu ta maneha e carganan cu ta yega. Esaki ta debi na e mesun situacion aki.

Barconan a cuminsa claim, pasobra nan ta keda mucho tempo para na Aruba pa motibo di un problema di huma. E problema di huma ta pone cu e trahadonan no por haci nan trabao. For di aña pasa caba, tanto prome minister Evelyn Wever-Croes, como minister Xiomara Ruiz-Maduro, a bisa cu WEB ta trahando pa baha e sulfur den e fuel oil di tal forma cu e no ta bay afecta e trabaonan riba waf. Te awe, aparentemente e problema aki no a conoce un solucion. No a tende nada mas di gobierno. Gobierno ta keto riba e problema aki, pero keto bay tin hopi problema cu e situacion di huma riba waf y ta paralisa e trabao totalmente.

Awe, diamars, un biaha mas, trabao ta plat. Barco Ipanema ta para for di mainta, y no ta bahando ningun container for di dje, pa motibo di e huma di WEB cu ta un molester pa e trahadonan. Y tin mas keho ta biniendo tambe di otro empresanan cu a cuminsa habri, haciendo trabaonan mas p’ariba di Astec, cu tambe aparentemente tin keho riba nan, pero ta wordo evalua si nan lo haya of lo pasa di molester, cu tambe ta un proceso cu tin cu cana.