E huma di WEB ta afectando mas y mas e operacion di ASTEC tur siman. Barconan cu ta yega Aruba pa baha container mester keda mas cu normal den waf na Baarcadera. E huma di WEB ta causa cu e personal di ASTEC no por traha riba field.
Hopi promesa a ser haci na e empleadonan tanto pa WEB, Gobierno y gerencia di ASTEC pero te awe nada a cambia. Tin barco cu ta bandona Aruba asina cu nan caba di baha e containernan despues di basta delay. Nan no ta warda pa carga e containernan bashi pa bay cune pasobra e barco a keda demasiado na Aruba y no ta resta tempo pa recoge e containernan bashi. Nan tin tanto tempo pa keda Aruba y sigui pa e siguiente Puerto. E huma di WEB ta strobe e operacion. Diaranzon e barco Anne a drenta y ora cu a prepara pa baha container e situacion di huma a bolbe causa problema.
A stop operacion y e problema di huma a dura basta. Djey diahuebs durante dia atrobe el a causa problema. Pesey mes ora cos a calma y a midi e huma den e aire, a sigui cu e trabou. E costo di operacion na ASTEC ta aumenta pasobra cu mester tene e trahadornan den overtime pasobra asina cu cos calma cu e huma molestoso mester ranca Sali despues di orario normal di e trahadornan. Te awe gerencia y gobierno ta keto riba e situacion aki. Hasta sindicato UPA y STA awor no kier bisa nada di e huma. Ora el a bira un problema cada biaha STA tabata core Sali grita blokia porta cu e trahadornan di ASTEC y otronan miembro di UPA. Awor parce nan ta den un silencio y ni maske e trahadornan busca atencion di esnan di STA of UPA, nan mes como sindicato ta bira e miembronan pa nan no protesta. El a bira normal awor cu ta para trabou y si mester caba den marduga ASTEC ta paga e overtime.
