Ministerio Publico a confirma awe tardi cu entretanto a prolonga detencion di e señora di inicialnan W.H. di 41 aña di edad, naci na Hulanda. Ta sospech’e di menasa y di a duna un alarma di bom falso na Aeropuerto, cu consecuencia cu varios vuelo a cancela of retrasa, hincando aerolineanan den gasto innecesario.
Tabata diadomingo ultimo net prome cu 10:00pm cu Aeropuerto a avisa Cuerpo Policial Aruba cu nan tin un situacion di emergencia, relaciona cu un pasahero cu a indica cu e tin un bom den su maleta. El a cay sinta den e “jet-bridge” y a pidi pa no laga ningun hende drenta eyden mas pa subi avion. E señora tabata bou influencia di alcohol y dificilmente por a rasona. Polis a detene pa neutralisa e situacion na Aeropuerto, aunke cu e trabou pisa ta sigui te den oranan lat di marduga.
Algo pasa di 12:00am a “clear” e avion y e area den e terminal di Aeropuerto mes. Ora cu a keda cla cu e avion, a bay over na controla maleta pa maleta, pa sigura cu ora e avion lanta vuelo, cu e ta liber di explosivo. E proceso ey a tuma luga na un area separa y leu for di e terminal mes di Aeropuerto. A nota Polisnan bisti cu un paña special pa atende cu explosivonan. E vuelo di TUI a continua te dialuna mainta pa Hulanda.
