Si antes tabata straño di mira un bashi na Amsterdam, awo ta straño di mira turista cu maleta of para hunto band’i canal. Aworaki Hulanda tin di lidia cu e efectonan di un bahada di 71% den turismo.
Aunke no ta exigi test di PCR pa drenta, ni ta obliga pa cumpli cu cuarentena, awe Amsterdam ta un ciudad di fantasma. E prostitutanan di Bario Cora no mester soporta miles di turista burachi cu ta acosa nan, ni saca nan potret diariamente. Tampoco fila largo pa drenta den coffeeshops. E barconan no ta nabegando den e canal, turistanan no ta cana den e cayanan di Amsterdam. E pandemia a laga e ciudad totalmente ireconocibel.
Hulanda ta spera un reduccion di mas cu 70% turistanan internacional pa 2020, na luga di e 22 miyon di persona cu nan tabata spera di ricibi, segun e calculacion na comienso di aña. E pais ta spera di haya 14 miyon di bishitante menos p’e pandemia inespera. Ademas e mesun Hulandesnan ta bay di vakantie den nan mesun pais compara cu aña pasa, cu un reduccion di 36% pa loke ta e mobilidad di turismo interno. Nan no ta spera un recuperacion te cu 2024, segun director di agencia di promocion di turismo NBTC, Jos Vranken. E cifranan actual ta na nivel di dos di añanan 90, pasobra casi henter e sector ainda ta den un depresion profundo y lo sigui asina.
Ademas di e fronteranan cera temporal y miedo di biaha pa hopi turista. E pandemia a obliga na cancela Gran Premio di Formula 1, festival di Eurovision, Eurocopa y otro eventonan internacional planea p’e aña ki.