Durante e prome tanda di tratamento di presupuesto pa aña 2020 di Ministerio di Binnenlandse Zaken y Koninkrijksrelaties, den Parlamento hulandes, esta Tweede Kamer, a cuestiona e capacidad di Gabinete Wever-Croes pa cumpli cu palabracionnan haci y e faboritismo politico pa acomoda “friends & family” yega na su partido.
Miembro di Tweede Kamer, De Graaf (PVV), a bisa cu Gobierno di Aruba no por, of miho dicho, ta nenga di hiba un maneho financiero manera debe ser. Segun de Graaf (PVV), Prome Minister Wever-Croes ta hopi mas interesa pa laga retira miembronan di Parlamento di oposicion.
Algun luna atras portalnan di noticia na Hulanda a condena e ponencia di Prome Minister Wever-Croes cu a pidi retiro di Parlamentario Richard Arends. E no tabata nada mas cu un atake contra un rival politico, compaña pa un campaña mediatico pa crea un smoke-screen pa e posibel intervencion di Hulanda. Purbando di atacha credibilidad di e Parlamentario ta mustra cu e hefe di gabinete en cuestion, Prome Minister Wever-Croes, tin masha poco respet pa e fundeshi Parlamentario vigente den Reino. De Graaf e categorisa esaki tambe como un novum den Reino Hulandes cu un gobernante ta exigi retiro di un miembro di Parlamento.
Parlamentario Bosman (VVD) na su turno a bisa cu Minister-President di Aruba no por sigui culpa Hulanda di e falta di efectivad di su maneho riba tereno di integridad den su mesun gobierno. Bosman (VVD) a cita Prome Minister di Aruba unda cu e ta indica cu Aruba tin plannan ambisioso riba tereno di integridad, pero cu ehecucion di esaki ta wordo atrasa door di e presion cu Hulanda ta pone riba reduccion di gastonan di gobierno, specialmente gastonan di personal.
Segun Bosman, Prome Minister Wever-Croes no ta compronde net nada di e materia, pasobra ta hustamente a gastonan di personal ta e base di tur e problemanan. Nepotismo y vriendjespolitiek ta reina y unda cu gobernantenan ta debolbe fabornan politico na amigonan y conocinan. Bisando esaki, Parlamento Hulandes ta cuestiona si e falta di efectividad di e maneho di integridad ta genuino of puro casualidad.
E preguntanan haci na Secretario di Estado Knops (CDA) tabata hopi al caso y ta subraya e preocupacionnan den comunidad di Aruba. Tratamento di presupuesto di Ministerio di Binnenlandse Zaken y Koninkrijksrelaties lo sigui diahuebs awor unda cu Secretario di Estado Knops (CDA) lo contesta e preguntanan haci den prome tanda riba su area di maneho.
