Conseho di Minister di Reino Hulandes awe mainta no a trata e peticion di Gobierno di Aruba pa ayudo financiero di 1.3 biyon florin. A pura e sindicatonan pa yega na un consenso pa por manda Hulanda riba e esfuersonan pa reduci gastonan di operacion di Gobierno, cu enfasis riba gastonan di personal, pero asina mes Hulanda a opta pa no trat’e mes ainda. E motibo ta cu e peticion lo mester drenta via CAft, cu lo evalua si di berdad ta reduciendo e gastonan na e forma corecto y aceptabel pa Hulanda.
Locual si Hulanda a acorda awe ta cu a pone un presupuesto di 16 miyon Euro disponibel pa traha paketenan di comestibel pa ciudadanonan den necesidad di cuminda na Aruba, Boneiro, Corsou, Saba, St. Maarten y St. Eustatius. Con lo reparti e suma aki no ta conoci ainda of no a tuma un decision riba dje. Probablemente e lo tin di haber cu e necesidad riba cada un di e 6 islanan cu hunto ta forma Caribe Hulandes.
Secretario di Estado Raymond Knops tabata hopi cla awe den su conferencia di prensa….no pidi Hulanda placa si Aruba mes no ta baha su gastonan. Den esey el a subraya salarionan halto di directornan den companianan priva di Gobierno y salarionan general cu ta mas halto cu e nivel den sector priva. Pesey Hulanda ta sali for di e punto di bista cu awor ta momento pa corta tur caminda, diseña un normal nobo, no solamente den aspectonan di salud, pero tambe den aspecto salarial y den gastonan general di Gobierno.
